Qazaqstanda negizgi kapıtalǵa salynǵan ınvestıtsııalar 2,5% tómendegen
ASTANA. QazAqparat - Qazaqstanda negizgi kapıtalǵa salynǵan ınvestıtsııalar 2019 jyldyń qańtarynda 644,5 mlrd teńge bolyp, byltyrǵydan 2,5% tómendegen, dep habarlaıdy QazAqparat QR Ulttyq ekonomıka mınıstrliginiń Statıstıka komıtetine silteme jasap.
Eseptik kezeńde ınvestıtsııalardyń negizgi kózderi sharýashylyq sýbektileriniń menshikti qarajaty bolyp otyr. Onyń kólemi - 604,2 mlrd teńge. Qańtarda mashınalardy, qural-jabdyqtardy, kólik quraldary men saımandardy satyp alýǵa jáne olardy kúrdeli jóndeýden ótkizýge baǵyttalǵan ınvestıtsııa 6,4% artqan.
Negizgi kapıtalǵa ınvestıtsııalardyń basym deni ken óndirý ónerkásibine jáne karerlerdi qazýǵa (56,1%), kólik jáne qoımalaý (8,7%), jyljymaıtyn múlikpen jasalatyn operatsııalarǵa (11,7%) tıesili. Іri kásiporyndardyń ınvestıtsııa kólemi 449,7 mlrd teńgeni qurap otyr.
