Qazaqstanda negizgi kapıtalǵa salynǵan ınvestıtsııalar 18,3% artty
ASTANA. QazAqparat - Qazaqstanda negizgi kapıtalǵa salynǵan ınvestıtsııalar 2018 jyldyń qańtar-qarashasynda 9630,1 mlrd teńgeni qurap, byltyrǵydan 18,3% artqan, dep habarlaıdy QazAqparat QR Ulttyq ekonomıka mınıstrliginiń Statıstıka komıtetine silteme jasap.
Eseptik kezeńde ınvestıtsııalardyń negizgi kózderi sharýashylyq sýbektileriniń menshikti qarajaty bolyp otyr. Onyń kólemi - 7043,2 mlrd teńge. Qańtar-qarashada mashınalardy, qural-jabdyqtardy, kólik quraldary men saımandardy satyp alýǵa jáne olardy kúrdeli jóndeýden ótkizýge baǵyttalǵan ınvestıtsııa 5,1% artqan.
Negizgi kapıtalǵa ınvestıtsııalardyń basym deni ken óndirý ónerkásibine jáne karerlerdi qazýǵa (41,7%), kólik jáne qoımalaý (12,4%), jyljymaıtyn múlikpen jasalatyn operatsııalarǵa (13%) tıesili. Іri kásiporyndardyń ınvestıtsııa kólemi 5381 mlrd teńgeni qurap otyr.
