Qazaqstanda negizgi azyq-túlik qory qansha

NUR-SULTAN. QazAqparat – 800 myń tonnadan astam túrli azyq-túlik taýarlarynyń qory bar. Bul týraly Aýyl sharýashylyǵy mınıstrliginen málim boldy, dep habarlaıdy QazAqparat.

«QR Aýyl sharýashylyǵy mınıstrligi azyq-túlik taýarlarynyń 32 túri boıynsha óńirlerdiń qamtamasyz etilýine apta saıyn monıtorıng júrgizedi. Monıtorıng turaqtandyrý qorlaryndaǵy, iri saýda jelilerindegi, jetkizýshiler men qaıta óńdeý kásiporyndarynyń qoımalaryndaǵy qorlardy eskeredi. Óńirlerdiń jedel derekterine qaraǵanda, bıylǵy 19 tamyzdaǵy jaǵdaı boıynsha elimiz boıynsha jalpy kólemi 819 myń tonna túrli azyq-túlik taýarlarynyń qory bar. Onyń ishinde óndirýshi kásiporyndarda – 301 myń tonna, qoımalarda – 86,6 myń tonna, saýda jelilerinde – 374 myń tonna, turaqtandyrý qorlarynda – 18,3 myń tonna. Budan basqa, 495,7 mln dana jumyrtqa qory bar», - delingen mınıstrlik málimetinde.

Kórsetilgen kólem ónim túrlerine baılanysty bir aıdan alty aıǵa deıingi merzimge jetkilikti.

«Azyq-túlik taýarlarynyń óndirisi artyp, qorlar únemi jańartylyp, tolyqtyrylyp otyrady. Sondyqtan olar boıynsha tapshylyq joq jáne uzaq merzimge jetkilikti turaqty qor bar», - dep atalyp ótken habarlamada.