Úkimette jumyssyzdar men NEET jastaryn jumyspen qamtý máselesi qaraldy
ASTANA. KAZINFORM — QR Premer-mınıstriniń orynbasary — mádenıet jáne aqparat mınıstri Aıda Balaevanyń tóraǵalyǵymen jumyssyz azamattardy jáne NEET sanatyndaǵy jastardy jumyspen qamtý máseleleri jóninde keńes ótti, dep habarlaıdy Úkimettiń baspasóz qyzmeti.
Jıynǵa Eńbek jáne halyqty áleýmettik qorǵaý, Ǵylym jáne joǵary bilim, Oqý-aǵartý, Mádenıet jáne aqparat, Ulttyq ekonomıka mınıstrlikteriniń ókilderi, sondaı-aq óńir ákimderiniń orynbasarlary qatysty.
Eńbek jáne halyqty áleýmettik qorǵaý mınıstrligi 35 myńnan astam adamdy qamtıtyn jumyssyz azamattardyń basym sanattaryn jumyspen qamtý josparynyń oryndalý nátıjelerin tanystyrdy. Búginde olardyń 8,4 myńy jumysqa ornalasyp, 12 myńǵa jýyq azamat jumyssyzdar esebinen shyǵarylǵan.
Sonymen qatar vedomstvo jumyspen qamtý salasyndaǵy qyzmetterdiń qoljetimdiligin arttyrýǵa baǵyttalǵan jańa tásilderdi usyndy. Birinshiden, Pavlodar oblysynda jasandy ıntellekt negizinde ázirlengen Tsıfrlyq jumyspen qamtý qyzmetiniń pılottyq jobasy iske qosyldy. Jasandy ıntellekt azamattar týraly derekterdi taldap, Telegram-bot arqyly olarǵa sáıkes keletin bos jumys oryndaryn, oqý baǵdarlamalaryn jáne ózge de qoldaý sharalaryn usynady. Ekinshiden, halyqtyń áleýmettik osal sanattarymen jumys isteýge arnalǵan mansap ortalyqtarynyń biryńǵaı ádistemesi bekitildi. Ol árbir azamatqa jeke tásil qoldanýdy jáne jumysqa ornalasqanǵa deıin qoldaý kórsetýdiń naqty algorıtmin kózdeıdi.
Jıyn barysynda Halyqty jumyspen qamtý josparynyń júzege asyrylý nátıjeleri de qaraldy. Qazirgi ýaqytta jospar 46%-ǵa oryndalǵan. Bıyl 548 myńnan astam adamdy jumyspen qamtý kózdelip otyr.
Sondaı-aq mansap ortalyqtarynyń qyzmetin azamattardyń suranysyna beıimdeý jumystary jalǵasýyp jatyr. Negizgi mindet — jumys izdeýshilerge qyzmet kórsetýdiń barlyq kezeńinde jeke qoldaý kórsetip, jumysqa ornalasqanǵa deıin súıemeldeý.
Jıynda NEET sanatyndaǵy jastardy jumyspen qamtý máselesine erekshe nazar aýdaryldy. «Otbasynyń tsıfrlyq kartasy» platformasynyń derekterine sáıkes, eńbekpen, bilim alýmen nemese ózge de qyzmetpen qamtylmaǵan jastardyń sany 6,7%-ǵa azaıǵan. Eń joǵary tómendeý kórsetkishi Túrkistan oblysynda tirkelip, 31,5%-dy qurady.
Mádenıet jáne aqparat mınıstrliginiń málimetinshe, mundaı oń nátıjege jastar resýrstyq ortalyqtarynyń júıeli ári nysanaly jumysy jáne «Jasyl el» jobasyn júzege asyrý arqyly qol jetkizilgen. Vedomstvo jobany jyl boıy júzege asyrylatyn formatqa kóshirýdi jáne jastar eńbek jasaqtarynyń qyzmet baǵyttaryn keńeıtýdi usyndy.
Jıyn barysynda aýyldyq jerlerge bilikti mamandardy tartýǵa baǵyttalǵan «Dıplommen aýylǵa» memlekettik baǵdarlamasynyń júzege asyrylý qorytyndylary da qaraldy. Joǵary oqý oryndarynda eńbek naryǵyna qajetti mamandardy daıarlaý, qajet bolǵan jaǵdaıda olardy qaıta oqytý kerek ekeni atap ótildi.
Tehnıkalyq jáne kásiptik bilim berý salasynda dýaldy oqytý júıesi joǵary tıimdilik kórsetip otyr. Kolledj túlekteriniń 71,9%-y alǵan mamandyǵy boıynsha jumysqa ornalasqan.
Sonymen qatar jumyspen qamtý kórsetkishteri ortasha respýblıkalyq deńgeıden tómen óńirlerdegi jaǵdaı jeke qaraldy. Mańǵystaý oblysyna erekshe nazar aýdarylyp, Premer-mınıstrdiń orynbasary óńir jastaryn jumyspen qamtýǵa járdemdesýdiń arnaıy tásilderin ázirleýdi tapsyrdy.
Jıyndy qorytyndylaǵan Aıda Balaeva jumyssyz azamattarmen jáne NEET sanatyndaǵy jastarmen júrgiziletin nysanaly jumysty kúsheıtip, olardy jumysqa ornalasqanǵa deıin turaqty túrde súıemeldeýdi tapsyrdy. Pedagogter men medıtsına qyzmetkerlerin jumyspen qamtý máseleleri boıynsha da jeke tapsyrmalar berildi. Salalyq memlekettik organdarǵa atalǵan mamandardyń jumysqa ornalasýyna járdemdesetin qosymsha tetikterdi ázirleý mindeti júkteldi.
Buǵan deıin jyl basynan beri 250 myńǵa jýyq adam jumyspen qamtylǵanyn jazdyq.
