Qazaqstanda naızaǵaı jarqyldap, ótkinshi jańbyr jaýady, jel kúsheıedi - 6 maýsymdaǵy aýa raıy boljamy
ASTANA. 5 maýsym. QazAqparat - 6 maýsymda Qazaqstan aýmaǵynyń basym bóligi burynǵysha atmosferalyq aǵyndardyń yqpalynda bolyp, sonyń saldarynan aýa raıynyń turaqsyz sıpaty saqtalady, keı jerlerde naızaǵaı jarqyldap, ótkinshi jańbyr jaýady, jel kúsheıedi.
Bul týraly QR TJM baspasóz qyzmeti Qazgıdrometke silteme jasap habarlaıdy.
Aqmola, Almaty, Ońtústik Qazaqstan, kúndiz Jambyl, Atyraý, Batys Qazaqstan, Aqtóbe, Qostanaı, Soltústik Qazaqstan oblystarynda jeldiń sekýndyna 15-20 metrge deıin kúsheıýi kútiledi.
Mańǵystaý oblysynda túnde jáne tańerteń keı jerlerde tuman túsedi. Respýblıkanyń batysynda, ońtústiginde jáne ortalyǵynda keı jerlerde óte joǵary órt qaýpi saqtalady.
Taıaýdaǵy táýlikterde respýblıkanyń ońtústigindegi taý ózenderiniń kópshiliginde sý deńgeıi qubylady, Batys Altaıdyń (ShQO) birqatar ózenderinde sý shyǵyny ulǵaıady. Almaty oblysynyń birqatar ózenderinde sý tasqyny qalyptasýy kútiledi. Qazaqstannyń jazyq aýmaqtarynda gıdrologııalyq rejimde aıtarlyqtaı ózgerister bolmaıdy dep kútilýde.
