Qazaqstanda «Nauryz Sale» merekelik aktsııasy bastaldy
ASTANA.KAZINFORM - Qazaqstanda Naýryz merekesine oraı «Nauryz Sale» respýblıkalyq aktsııasy bastaldy.
Caýda jáne ıntegratsııa mınıstrligi málimetinshe, merekelik naýqan 13–23 naýryz aralyǵynda el aýmaǵynda ótip, júzdegen saýda alańyn biriktirip, turǵyndar men el qonaqtary úshin kóktemgi jańarý men tıimdi saýdanyń erekshe atmosferasyn qalyptastyrýda.
Aktsııa aıasynda saýda nysandary satyp alýshylarǵa azyq-túlik jáne azyq-túlik emes taýarlarǵa 10–70 paıyzǵa deıin jeńildikter usynyp jatyr. Aktsııalyq taýarlar arnaıy merekelik baǵa belgilerimen jáne navıgatsııalyq kórsetkishtermen belgilengen, bul kelýshilerge jeńildikpen usynylǵan taýarlardy ońaı tabýǵa múmkindik beredi.
Aktsııaǵa shamamen 300 saýda sýbektisi qatysyp jatyr. Olardyń qatarynda 140 saýda úıi men saýda-oıyn-saýyq ortalyǵy, 140 saýda jelisi jáne 20 ınternet-platforma bar.
Qatysýshylar arasynda elimizdiń iri saýda jelileri Magnum Cash&Carry, Small, Galmart, Anvar, Dına, Toimart, Astykjan, Greenwich jáne basqalary bar. Aktsııa barysynda otandyq óndirýshilerdi qoldaýǵa erekshe kóńil bólinip jatyr.
Saýda ortalyqtarynda qazaqstandyq kompanııalardyń ónimderi usynylǵan arnaıy aımaqtar uıymdastyrylyp, onda taýarlar naryqtyq baǵadan orta eseppen 10–20 paıyzǵa tómen baǵamen satylyp jatyr. Satyp alýshylar da birqatar taýarlar baǵasynyń aıtarlyqtaı tómendegenin atap ótken.
— Jeńildikter óte kóp ekenin kórip otyrmyn. Osy saýda jelisinde aktsııa arqyly 5 keli undy 1400 teńgege satyp aldym, sondaı-aq kókónisterdiń baǵasy da tómendegen — kartop pen sábiz aldym. Shynymdy aıtsam, 100 teńgelik baǵa belgilerin burynnan kórmep edim, búgin shynymen merekelik jeńildikter seziledi, — dedi elorda turǵyny Aqbota Jaqaeva.
Merekelik kóńil kúıdi elimizdiń barlyq óńirinde ótip jatqan aýyl sharýashylyǵy jármeńkeleri de tolyqtyryp jatyr. Munda turǵyndar jergilikti óndirýshilerdiń jańa ónimderin qoljetimdi baǵada satyp ala alady.
«Nauryz Sale» aktsııasy Naýryzdy jalpyhalyqtyq merekeleýdiń bir bóligine aınalyp, otandyq bıznesti qoldaýǵa, ishki saýdany damytýǵa jáne qazaqstandyqtar úshin mereke qarsańyndaǵy saýdany odan ári tıimdi etýge baǵyttalǵan.
Aıta keteıik, Qazaqstanda azyq-túlik ınflıatsııasy 12,7%-ǵa deıin tómendedi.