Qazaqstanda «Nauryz Sale» merekelik aktsııasy bastalady
ASTANA. KAZINFORM – Naýryz merekesi qarsańynda Qazaqstanda 13–23 naýryz aralyǵynda aýqymdy respýblıkalyq «Nauryz Sale» aktsııasy bastalady. Bastama otandyq óndirýshilerdi qoldaýǵa, ishki saýdany yntalandyrýǵa jáne el turǵyndary men qonaqtary úshin biryńǵaı merekelik atmosfera qalyptastyrýǵa baǵyttalǵan. Bul týraly Saýda jáne ıntegratsııa mınıstrligi habarlady.
Aktsııa kezeńinde saýda sýbektileri halyqqa azyq-túlik jáne azyq-túlik emes taýar toptaryna 10–70 paıyz aralyǵynda merekelik jeńildikter usynady. Aktsııalyq taýarlar saýda zaldarynda arnaıy merekelik navıgatsııa jáne «Nauryz» fırmalyq bezendirýi arqyly belgilenedi. Atap aıtqanda, taqyryptyq baǵa belgileri, brendtelgen kórsetkishter, bannerler jáne basqa da POS-materıaldar ornalastyrylyp, satyp alýshylarǵa assortımentte ońaı baǵdarlanyp, jeńildikpen usynylǵan taýarlardy jyldam tabýǵa múmkindik beredi.
Aktsııaǵa ishki saýda salasynyń shamamen 300 sýbektisi qatysady. Olardyń qatarynda 140 saýda úıi men saýda-oıyn-saýyq ortalyǵy, 140 saýda jelisi jáne 20 elektrondyq saýda sýbektisi bar. Qatysýshylar qatarynda eldiń iri saýda jelileri — Magnum, Small, Galmart, «Anvar», «Dına», Toimart, «Astykjan», «Aıan», Greenwich jáne basqalary, sondaı-aq Mega Silk Way, Keruen, Keruen City, «Arýjan», «Saryarka», Shymkent Plaza sııaqty iri saýda úıleri men saýda-oıyn-saýyq ortalyqtary bar.
Aktsııa aıasynda otandyq óndirýshilerdi qoldaýǵa erekshe nazar aýdarylady. Saýda ortalyqtarynda qazaqstandyq óndirýshilerdiń ónimderi usynylatyn arnaıy satý aımaqtary uıymdastyrylyp, onda taýarlar naryqtaǵy baǵadan orta eseppen 10–20 paıyzǵa tómen baǵamen satylatyn bolady.
Saýda ortalyqtaryna kelýshiler úshin mazmundy ınteraktıvti baǵdarlama da qarastyrylǵan. Eldiń iri saýda-oıyn-saýyq ortalyqtarynda ulttyq naqyshtaǵy fotozonalar uıymdastyrylady.
Seriktestik aıasynda Qazaqstan boıynsha 11 saýda núktesi bar «Tarbıe» ulttyq kıim dúkeni ulttyq naqyshtaǵy kıimderdi usynady. Kelýshiler olardy kıip kórip, estelikke sýretke túse alady. Mundaı aımaqtardy elimizdiń iri saýda ortalyqtarynda ornalastyrý josparlanǵan. Atap aıtqanda, Aqtaýdaǵy SAYA Mall, Petropavldaǵy Dostyk Mall, Aqtóbedegi KeruenCity, Astanadaǵy Keruen City Astana, Atyraýdaǵy Infinity Mall, Túrkistandaǵy Turan Mall, Almatydaǵy Dostyk Plaza jáne Shymkenttegi Shymkent City Mall saýda ortalyqtarynda uıymdastyrý kózdelip otyr.
Buǵan deıin Saýda jáne ıntegratsııa mınıstrligi Qazaqstannyń saýda sýbektileri arasynda «Sauda in Digital Nauryz» respýblıkalyq konkýrsynyń ótkiziletinin jarııalaǵan bolatyn. Konkýrs 2026 jylǵy 13–20 naýryz aralyǵynda ótedi jáne saýda nysandaryn merekelik bezendirýde zamanaýı tsıfrlyq sheshimderdi engizýge, sondaı-aq ınnovatsııalyq servısterdi damytýǵa baǵyttalǵan.
Qatysýshylar óz jobalaryn tórt nomınatsııa boıynsha usyna alady: «Úzdik tsıfrlyq bezendirý», «Úzdik tsıfrlyq quttyqtaý», «Jasandy ıntellektti úzdik paıdalaný» jáne «Eń kreatıvti Digital-joba». Qatysý úshin Instagram áleýmettik jelisinde #saudadigitalnauryz heshtegimen beınerolık jarııalap, Saýda jáne ıntegratsııa mınıstrliginiń resmı paraqshasyn belgileý qajet.
Jeńimpazdardy kreatıv, jasandy ıntellekt tehnologııalaryn qoldaný, ulttyq biregeılik, aýdıtorııanyń belsendiligi jáne jobanyń oryndalý sapasy krıterııleri boıynsha saraptamalyq komıssııa anyqtaıdy. Konkýrs qorytyndysy 2026 jylǵy 20 naýryzda shyǵarylyp, jeńimpazdardy saltanatty marapattaý rásimi ótedi.
Eskertý: respýblıkalyq aktsııaǵa bastamany qoldap, áleýmettik jaýapkershilik tanytqan saýda sýbektileri qatysady. Qazaqstan Respýblıkasynyń óńirleri boıynsha aktsııaǵa qatysýshylardyń tizimi qosa beriledi.
Aıta keteıik, Qazaqstanda azyq-túlik ınflıatsııasy 12,7%-ǵa deıin tómendedi.
