Qazaqstanda Naýryz meıramyn merekeleýdiń jańa tujyrymdamasy ázirlendi

NUR-SULTAN. QazAqparat – Ulystyń uly kúni – Naýryz meıramyn toılaýdyń jańa tujyrymdamasy ázirlendi. Bul týraly QR Mádenıet jáne sport vıtse-mınıstri Nurǵısa Dáýeshov málim etti, dep habarlaıdy QazAqparat tilshisi.

«Naýryz meıramy - tereń dástúrli qundylyqtardyń qaınar kózi jáne ulttyń biregeıligin qurýdyń joǵary shoǵyrlandyrýshy áleýeti men tetigi bar asa mańyzdy búkilhalyqtyq mereke. Memleket basshysynyń tapsyrmasyna sáıkes Naýryz meıramyn merekeleýdiń negizgi maqsaty Qazaqstandaǵy beıbitshilik pen kelisimdi nyǵaıtý, azamattardy eldiń jasampaz damýynyń ortaq mindeti aınalasyna toptastyrý, ortaq mádenı-rýhanı qundylyqtar men jalpyulttyq sanany qalyptastyrý bolýǵa tıis. Osyǵan sáıkes Naýryzdy merekeleýdiń jańa tujyrymdamalyq tásilderi ázirlendi», - dedi Nurǵısa Dáýeshov Ortalyq kommýnıkatsııalar qyzmetinde ótken baspasóz máslıhatynda.

Vıtse-mınıstrdiń aıtýynsha, Naýryz meıramyn toılaýdy zaman aǵymyna qaraı jańa formatqa aýystyratyn ýaqyt keldi.

«Naýryz tatý kórshilik pen jergilikti qaýymdastyqtardyń merekesi. Bul tujyrymdamany aýlalarda, qoǵamdastyqtarda, otbasylarda toılaýdy oqshaýlap, qazirgi álemniń ýrbanıstik jaǵdaılaryna beıimdeý usynylady», - deıdi ol.