Qazaqstanda «Naýryz» turǵyn úı baǵdarlamasy iske qosylady

ASTANA. KAZINFORM – Bıyl mamyrda elimizde taǵy bir turǵyn úı ıpotekasy ashylady. Jańa turǵyn úı baǵdarlamasynyń talaptary men erejeleri týraly «Otbasy bankiniń» ókilderi aıtyp berdi. 

«Naýryz» ıpotekasynyń basqa turǵyn úı baǵdarlamalarynan basty aıyrmashylyǵy – salymshynyń depozıt (Otbasy bankindegi depozıt) merzimine qaramaıdy, ıaǵnı búgin depozıt ashyp, erteń baǵdarlamaǵa qatysýǵa bolady. Biraq depozıtte kem degende 1 mln teńge bolýy tıis. Taǵy bir talap qatysýshy men onyń otbasy músheleriniń atynda sońǵy 5 jyl ishinde jyljymaıtyn múlik (turǵyn úı, jer telimi taǵy sol sııaqty) bolmaýy qajet.

Nesıe merzimi – 19 jyl (20%). Taǵy bir aıta ketetin jaıt, turǵyn úı kezeginde turǵan azamattarǵa nesıe 7%, al kezekte turmaǵandarǵa 9% beriledi. Turǵyn úı baǵdarlamasyna 18-62 jas aralyǵyndaǵy Qazaqstan azamaty qatysa alady. Sondaı-aq, qatysýshy «Otbasy bankinde» depozıti bar salymshy bolýy jáne tabys kózin rastaýy mindetti.

Ótinish 2024 jylǵy 1 mamyrdan bastap otbasybank.kz (baspana market platformasy) saıty arqyly onlaın formatta qabyldanady. Ótinishterdi qaraý barysynda depozıttiń ashylý merzimi, ondaǵy soma men syıaqy kólemi jáne qatysýshynyń otbasylyq jaǵdaıy eskeriledi.

«Otbasy banki» ókilderiniń aıtýynsha, «Naýryz» turǵyn úı ıpotekasyna 300 mlrd teńge bólinedi jáne turǵyn baǵdarlamasy 7-8 jylǵa jalǵasady. Aıta ketsek, Astana, Almaty, Shymkent qalasy jáne oblys ortalyqtarynda tek alǵashqy naryqtaǵy turǵyn úıler usynylady.

Eske sala ketsek, 15 naýryzda ótken Ulttyq quryltaıdyń úshinshi otyrysynda Memleket basshysy baspana jurttyń turmys sapasyn tanytatyn taǵy bir mańyzdy kórsetkish deı kele, elimizde jańa turǵyn úı baǵdarlamasyn qolǵa alý kerektigin aıtqan edi.