Qazaqstanda naýryz-sáýirde aýa raıy qandaı bolady
ASTANA. KAZINFORM – Qazaqstanda naýryz aıy jyly ári jaýyn-shashyndy bolady. Al sáýirde eldiń basym bóliginde aýa temperatýrasy qalypty deńgeıden joǵary bolady. Bul týraly OKQ alańynda ótken brıfıngide «Qazgıdromet» RMK bas dırektorynyń birinshi orynbasary Áset Qalıev málimdedi.
Sınoptıkterdiń aıtýynsha, qazirdiń ózinde ońtústik jáne ońtústik-batys óńirlerde aýa raıy jylynyp, temperatýra nólden joǵary. Naýryzdyń úshinshi onkúndiginde jylyný batys óńirlerde de baıqalady. Al soltústik, ortalyq jáne shyǵys aımaqtarda aýa raıy birden jylymaıdy. Bul óńirlerde sýyq aýa raıy biraz ýaqyt saqtalady.
– Túngi aýa temperatýrasy birtindep -13 gradýstan +5 gradýsqa deıin ózgeredi. Kúndizgi temperatýra keı jerlerde +13 gradýsqa deıin kóteriledi, - dedi Áset Qalıev.
«Qazgıdromet» málimetinshe, Naýryz aıynda jaýyn-shashyn mólsheri qalypty deńgeıde bolady. Sonymen qatar 22–24 naýryz aralyǵynda elimizdiń birqatar óńirinde jańbyr jaýýy múmkin.
Sáýir aıynda aýa raıy qubylmaly bolady. Aıdyń basynda soltústik, ortalyq jáne shyǵys óńirlerde túnde keı kúnderi -10 gradýsqa deıin sýytýy múmkin.
Al sáýirdiń ortasynan bastap eldiń kóp bóliginde aýa temperatýrasy turaqty túrde nólden joǵary bolady.
Jaýyn-shashynǵa kelsek, Batys Qazaqstan, Atyraý, Mańǵystaý oblystarynda, Aqtóbe oblysynyń batysynda, sondaı-aq Túrkistan men Jambyl oblystarynyń ońtústiginde, Almaty oblysynyń ońtústik-shyǵysynda, Jetisý, Shyǵys Qazaqstan jáne Abaı oblysynyń shyǵys bóliginde jaýyn-shashyn kóbirek túsýi múmkin. Al qalǵan óńirlerde jaýyn-shashyn qalypty deńgeıde bolady.
Sonymen qatar sınoptıkter sý tasqyny qaýpi bar óńirlerdi atady.