Qazaqstanda naýqastardyń jaı-kúıin smartfonmen baqylaý jobasy maquldandy
ASTANA. QazAqparat - QR Investıtsııalar jáne damý mınıstrligi men «Tehnologııalyq damý jónindegi ulttyq agenttik» AQ qoldaýymen qurylǵan GlucoWays startapy densaýlyq saqtaý salasyndaǵy jańa qosymshany tekserýden ótkizip jatyr, dep habarlaıdy TDUA baspasóz qyzmeti.
GlucoWays - bul naýqastardyń jaǵdaıyn baqylaıtyn smartfondar men veb-serverlerge negizdelgen avtomattandyrylǵan onlaın júıe. Ol qandaǵy glıýkoza mólsherin baqylap qana qoımaı, ınternet pen telefon arqyly naýqastarǵa qashyqtan medıtsınalyq konsýltatsııalar uıymdastyrýǵa da múmkindik beredi.
Atalǵan tehnologııany kommertsııalandyrýǵa 4 mıllıon 500 myń teńge jiberildi, onyń 4 mıllıon teńgesi - ınnovatsııalyq grant bolsa, qalǵan somany joba ázirleýshileri ınvestıtsııalaǵan.
Sonymen birge, GlucoWays jobasynyń avtory Álim Hamıtovtyń aıtýynsha, qant dıabetimen aýyratyn adamdardyń qanyndaǵy qant mólsherin tez jáne aýyrtpaı anyqtaıtyn GlucoWays klıpsteri jasaldy.
GlucoWays qurylǵysyn qant dıabetimen aýyratyndar ǵana emes, aýyrý qaýpi tónip turǵandar da qoldana alady. Qurylǵy qandaǵy qant mólsherin turaqty baqylaýǵa qajet jáne naryqtaǵy eń jınaqty ári yńǵaıly qural bolýy múmkin.
