Qazaqstanda nashaqorlyqtyń aldyn alý aılyǵy bastalady

ASTANA. QazAqparat - 2 maýsym kúni respýblıkada «Seniń bolashaǵyń tek ózińe baılanysty! Deniń saý bolsyn! Nashany qoldanba!» uranymen Halyqaralyq nashaqorlyqpen jáne esirtkiniń zańsyz aınalymymen kúres kúnine arnalǵan aılyq bastaldy. Atalǵan shara shilde aıynyń 2-ne deıin jalǵasady. Bul týraly QR Densaýlyq saqtaý jáne áleýmettik damý mınıstrliginiń baspasóz qyzmetinen habarlady.

Aılyq barysynda Qazaqstannyń barlyq óńirlerindegi alǵashqy medıtsınalyq-sanıtarlyq kómek uıymdarynda ashyq esik kúnderi uıymdastyrylyp, azamattarǵa psıhologtar, beıindi mamandar men áleýmettik qyzmetkerler keńes beredi. Sonymen qatar,  halyq kóp jınalatyn oryndarda «Densaýlyq jarnamasy» atty flesh-mob sharalary; balalardyń boıyna senim uıalatý arqyly olardy tárbıeleý týraly ata-analarmen áńgimelesý; balalardyń boıynda devıantty minez-qulyqqa jol bermeý maqsatynda ata-ana men balalardyń ózara qatynasyna qolaıly jaǵdaı jasaý, ózin-ózi qorǵaý ádetin qalyptastyrý men damytý sharalary júzege asyrylady.

Esirtki paıdalanýdyń aldyn alý jáne olardyń zańsyz aınalamyna qarsy kúres - respýblıkada memlekettik saıasattyń mańyzdy baǵyttarynyń biri.

Psıhoaktıvti zattardyń densaýlyqqa tıgizetin orasan zııany týraly halyqty aqparattandyrý deńgeıin arttyrý boıynsha qabyldanyp jatqan is-sharalar jáne jastar men jasósipirimderge qolaıly psıhologııalyq jáne áleýmettik jaǵdaılar jasaýǵa qoǵam nazaryn aýdarý densaýlyqqa degen jaýapty kózqarasty, sondaı-aq, psıhoaktıvti zattardy tutynýdan bas tartý mashyqtaryn qalyptastyrýǵa yqpal etedi.   

Esterińizge sala keteıik, 1987 jyly BUU Bas Assambleıasy bekitken Halyqaralyq nashaqorlyqpen jáne esirtkiniń zańsyz aınalymymen kúres kúni 26 maýsym kúni atap ótiledi.