Qazaqstanda nashaqorlyqpen kúres aılyǵy bastaldy

ASTANA. QazAqparat - «Salamatty Qazaqstan» memlekettik baǵdarlamasy aıasynda búgin respýblıkada «Seniń ómiriń. Seniń qoǵamyń. Esirtkige oryn joq!» uranymen Halyqaralyq nashaqorlyqpen jáne esirtkiniń zańsyz aınalymymen kúres kúnine arnalǵan aılyq bastaldy.

«Aılyq barysynda Qazaqstannyń barlyq óńirlerinde dóńgelek ústelder, pikirtalastar uıymdastyrylyp, olarǵa ataqty akterler, sportshylar men ánshiler qatysady. Halyq kóp jınalatyn oryndarda tanymal adamdar men ardagerlerdiń qatysýymen flesh-mob sharalaryn ótkizý josparlanǵan. Medıtsınalyq-sanıtarlyq alǵashqy kómek uıymdarynda, narkodıspanserlerde, jastardyń densaýlyq mektepterinde jáne temekige qarsy ortalyqtarda ashyq esik kúnderi uıymdastyrylyp, azamattarǵa psıhologtar, narkologtar jáne áleýmettik qyzmetkerler tegin keńester beredi», - delingen QR Densaýlyq jáne áleýmettik damý mınıstrligi málimetinde.

Birikken Ulttar Uıymynyń Esirtkini baqylaý jónindegi komıtetiniń 2014 jylǵy baıandamasynda esirtki tutynýshylardyń jalpy sany álem halqynyń ósimine saı artyp kele jatqany aıtylǵan. Ine arqyly esirtki paıdalatyn tulǵalardyń jartysynan astamy S gepatıtin juqtyrǵan degen joramal bar.

«Alkogol jáne esirtkige monıtorıng ortalyǵy» qoǵamdyq qory jarııalaǵan 2014 jylǵa arnalǵan Qazaqstandaǵy nashaqorlyq týraly ulttyq esepke sáıkes, respýblıkadaǵy esirtki tutynýshylardyń negizgi bóligi ishki ınektsııalarǵa tıesili. Esirtki paıdalanýdyń aldyn alý jáne olardyń zańsyz aınalymyna qarsy kúres - respýblıkada memlekettik saıasattyń mańyzdy baǵyttarynyń biri.