Qazaqstanda náreste ólimi 22,7%-ǵa tómendedi
ASTANA. KAZINFORM – Qazaqstanda bıylǵy jyldyń birinshi jartyjyldyǵynda náreste ólimi 22,7 paıyzǵa tómendedi. Bul týraly Premer-Mınıstr Oljas Bektenov AMANAT partııasy fraktsııasynyń keńeıtilgen otyrysynda málim etti.
«Biz 2029 jylǵa qaraı halyqtyń ómir súrý uzaqtyǵyn keminde 77 jasqa jetkizý maqsatyna birtindep jaqyndap kelemiz. Ótken jyldyń qorytyndysy boıynsha ómir súrý uzaqtyǵy alǵash ret 75 jyl 4 aıǵa jetti. Memleket basshysynyń qoldaýy men turaqty nazarynyń arqasynda densaýlyq salasyndaǵy negizgi kórsetkishterdi jaqsartýǵa qol jetkizildi», – dedi Úkimet basshysy.
Onyń aıtýynsha, «Aýylda densaýlyq saqtaýdy jańǵyrtý» ulttyq jobasy aıasynda óńirlerde 655 medıtsınalyq nysannyń 540-y salynǵan. Bul ortalyqtar shamamen 1 mln aýyl turǵynyn medıtsınalyq qyzmetpen qamtıdy.
Premer-Mınıstr Úkimettiń áleýmettik ınfraqurylymdy damytýǵa erekshe kóńil bólip otyrǵanyn atap ótti. Memleket basshysynyń tapsyrmasyna sáıkes, bıyl halyqty 100 paıyz aýyz sýmen qamtamasyz etý jobalary aıaqtalmaq. Osy maqsattarǵa respýblıkalyq bıýdjetten 147 mlrd teńge, sondaı-aq Arnaýly memlekettik qor esebinen 160 mlrd teńgeden astam qarjy bólingen. Jyl sońyna deıin 17 qala men 463 aýylda jobalardy aıaqtaý josparlanyp otyr.
«Aýyl amanaty» jobasy aıasynda aýyl kásipkerligin qoldaý úshin 25 myń joba qarjylandyrylady. Bul 30 myń jańa jumys ornyn ashýǵa múmkindik beredi. Al 2026 jyly óńirlerdi qoldaýǵa 5,4 trln teńge baǵyttalmaq.
«Óńirlerdegi ómir súrý sapasyn arttyrýdyń negizgi quraly – tek tikeleı qarjylandyrý emes, damý ınstıtýttary arqyly memlekettik qoldaý tetikteri. Mysaly, «Báıterek» holdıngi jyl basynan beri kásipkerlerge 4 trln teńgeden astam qarjylyq qoldaý kórsetti. Bul 8 trln teńge bolatyn jyldyq jospardyń 50 paıyzynan astamyn quraıdy. Onyń shamamen 2 trln teńgesi shaǵyn jáne orta bıznesti damytýǵa, 1,5 trln teńgeden astamy qosalqy shaǵyn kásiporyndarmen tyǵyz baılanys ornatatyn iri bıznesti qoldaýǵa baǵyttaldy», – dedi Oljas Bektenov.
Aıta keteıik, Úkimet TURAN arnaıy ekonomıkalyq aımaq terrıtorııasyn keńeıtti.