Qazaqstanda naqty ǵylymdar salasy tek aǵylshyn tilinde sóıleıdi
«Bizdi keleshekte ne kútip tur? Aldaǵy kezeńde saty-saty boıynsha qoldanbaly ǵylym túrleriniń barlyǵy aǵylshyn tiline aýdarylady. Bul Bilim jáne ǵylym mınıstrliginiń emes, ýaqyttyń talaby. Barlyq memlekettik granttar, barlyq saraptama jumystary aǵylshyn tilinde bolady», - dep málimdedi QR BǴM vıtse-mınıstri Aslanbek Amrın «Ǵylym men bıznesti biriktirý quraly retinde tehnologııalardy kommertsııalandyrý» forýmynda.
Vıtse-mınıstr ǵalymdardyń aǵylshyn tilin bilýi kerektigin atap ótti.
«Biz tek qana qoldanbaly ǵylym salasy týraly aıtyp otyrmyz. Málimetterge sáıkes, qoldanbaly ǵylym salasyndaǵy ǵalymdardyń kóbi aǵylshyn tilin meńgergen. Óıtkeni bul jaratylystaný ǵylymy. Álemdegi ǵalymdar halyqaralyq forýmdarda aǵylshyn tilinde sóıleıdi. Sondyqtan, erte me, kesh pe biz de osyǵan kelemiz. Daıyn bolyńyzdar. Túrkııa, Malaızııa, Germanııa elderinde tehnıkalyq mamandyq boıynsha oqytýlar men zertteýler aǵylshynsha ótedi. Biz de osy tájirıbeni engizemiz», - deıdi ol.
Sonymen qatar, 2018 jyly QR Bilim jáne ǵylym mınıstrligi halyqaralyq dárejede jumys barysyn keńeıtip, qazaqstandyq ǵalymdardy shetelge jibermek.
«Bul ne úshin jasalyp otyr? Biz ǵalymdarymyzdyń erkindik qaǵıdaty bolǵanyn qalaımyz. Eger bizdiń ǵalymdarǵa eksperımıntaldy ǵylymmen aınalysýy kerek bolsa, onyń sol sala zertteletin elge barýyna quqyǵy bolyp, sol tájirıbeni Qazaqstanǵa ákelýi kerek. Biz bul jumysty kelesi jyly bastaımyz. Aldyn ala kelissózderdi júrgizdik. Sheteldik seriktester tarapynan ortaq daıyndyq bar», - deıdi vıtse-mınıstr.
