Qazaqstanda MJS jobalaryn júzege asyrý úshin uzaq kezeńge negizdelgen ári «arzan» qarjy tartylady
ASTANA. QazAqparat - «Báıterek» holdıngi memlekettik-jekemenshik seriktestik (MJS) jobalaryna ekinshi deńgeıli bankterden qor quıý úshin uzaq kezeńdi jáne «arzan» qarjyny tartýǵa nıetti. Bul týraly «Memlekettik-jekemenshik seriktestik jobalary arqyly jeke sektorǵa ınvestıtsııa tartý» forýmynda holdıng basshysy Qaýyndyq Bıshimbaev aıtty.
Sonymen qatar «Báıterek» jobalardy memlekettik-jekemenshik seristestik arqyly júzege asyrý úshin Jobalardy daıarlaýdyń mamandandyrylǵan qoryn qurýdy usynyp otyr. Bundaı qor jobalardy ázirleý barysynda bıýrokrattyq kedergilerdi eńserýge jáne tájirıbeli mamandardy tartýǵa múmkindik bermek. Aıta keteıik, qazirgi ýaqytta «Báıterek» holdınginiń enshiles kompanııasy, ıaǵnı Memlekettik-jekemenshik seriktestik jobalaryn súıemeldeý ortalyǵy Halyqaralyq qarjy korporatsııasymen birlese otyryp, Úlken Almaty aınalma jolyn (ÚAAJ) salýda keńesshi mindetin atqarýda. Belgili bolǵandaı, ÚAAJ-yn salý jáne paıdalanýdy kontsessııa tetigin paıdalana otyryp memlekettik-jekemenshik seriktestik prıntsıpi boıynsha iske asyrý josparlanýda. Osy aqyly avtomobıl jolyn 4,5 jyldyq kezeńde (2015-2019 jj.) salyp, odan keıin 15,5 jyl boıy paıdalanýy qarastyrylǵan. ÚAAJ «Batys Eýropa - Batys Qytaı» tranzıttik dáliziniń aıryqsha mańyzdy býyny bolyp esepteletini belgili. Uzaqtyǵy 66 shaqyrym avtojol 4 jáne 6 jolaqty parametri І tehnıkalyq sanattaǵy qozǵalysqa arnalyp, tsement-beton jamylǵysymen salynady. Joba boıynsha 21 kópir, 19 jol ótpesi jáne 12 kólik aıyryǵyn salý qarastyrylǵan. QR Ulttyq ekonomıka mınıstri Erbolat Dosaevtyń sózine qaraǵanda, Úlken Almaty aınalma joly jobasy aldaǵy jyldan bastap júzege asyrylady. «Osy oraıda biz ınvestorlarǵa usynylýy tıis barlyq qujattar toptamasyn daıarlap, 9 jeltoqsanda Londonda Eýropalyq Qaıta qurý jáne Damý banki men Halyqaralyq qarjylyq korporatsııanyń qoldaýymen áleýetti ınvestorlarmen keńes ótkizýdi josparlap otyrmyz», - dedi mınıstr atalǵan forýmda.
