Qazaqstanda MJÁ jobalaryn qaraý merzimi qysqarady
ASTANA. QazAqparat - Qazaqstanda memlekettik-jekeshelik áriptestik jobalaryn qaraý merzimi aıtarlyqtaı qysqartylady. Bul týraly búgin Úkimet úıindegi baspasóz máslıhatynda «Qazaqstandyq memlekettik-jekeshelik áriptestik ortalyǵy» AQ basqarma tóraǵasynyń orynbasary Talǵat Mataev aıtty, dep habarlaıdy QazAqparat.
«Qazirgi ýaqytta zańnamany jetildirý aıasynda jumystar júrgizilýde jáne basty ózgeristerdiń biri memlekettik-jekeshelik áriptestik jobalaryn kelisý ári saraptaý merzimin 7 aıdan 3 aıǵa deıin qysqartý arqyly ońtaılandyrý kózdelýde»,- dedi ol.
Onyń aıtýynsha, «Qazaqstandyq memlekettik-jekeshelik áriptestigi týraly» zań qabyldanǵannan beri áriptestiktiń túrli jobalary talqylaýdan ótip, tetikteri iske asa bastaǵan.
«Memlekettik-jekeshelik áriptestiktiń tıimdiligin ýaqyt kórsetti. Endi ony iske asyrýdyń tetigin áli de bolsa jetildirý kerek. Osy oraıda kásipkerlerdiń usynys-pikirlerin nazarǵa ala otyryp, birlese jumys isteýdiń tetikteri jeńildetildi», - dedi Mataev.
Basqarma tóraǵasy orynbasarynyń sózine qaraǵanda, «QR-nyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasynda memlekettik-jekeshelik áriptestikti jetildirýdi qamtıtyn sharalar kózdelgen. Bul zań jobasy búginde Májiliste maquldanyp, Senat qaraýyna usynylyp otyr. Zań jobasyna sáıkes MJÁ-ni jańǵyrtý tetikteri 9 tarmaqty qamtıdy.
