Qazaqstanda MJÁ jobalaryn júzege asyrýda halyqaralyq áriptestik kúsheıdi
ASTANA. KAZINFORM — QR Prezıdentiniń keńesshisi — Strategııalyq josparlaý jáne reformalar agenttiginiń (SJRA) basshysy Áset Erǵalıev Naryqtardy damytý jáne memlekettik-jekeshelik áriptestik jónindegi keńse basshysy Takeo Koıke jetekshilik etken Azııa damý bankiniń delegatsııasymen kezdesý ótkizdi.
Agenttiktiń málimetinshe, keńestiń negizgi taqyryby Azııa damý bankiniń (ADB) qatysýymen iske asyrylyp jatqan memlekettik-jekeshelik áriptestik jobalary boldy.
Talqylaý barysynda áleýmettik jáne energetıkalyq ınfraqurylymdy damytýǵa, ınvestıtsııalar tartýǵa jáne halyqqa kórsetiletin qyzmetterdiń sapasyn arttyrýǵa baǵyttalǵan negizgi ınfraqurylymdyq jobalardy iske asyrý máseleleri qaraldy.
Azııa damý bankimen barlyq negizgi jobalar boıynsha sheshimderdi pysyqtaýdan bastap konkýrstyq rásimderdi súıemeldeýge jáne kelisimder jasasýǵa deıingi kezeńderdi qamtıtyn belsendi birlesken jumys atap ótildi.
Takeo Koıke jobalardy iske asyrýdaǵy SJRA-nyń úılestirýshi rólin atap ótti.
— SJRA tarapynan úılestirýdiń arqasynda memlekettik organdarmen ózara is-qımyl neǵurlym júıeli ári jedel bola tústi. Jobalardy iske asyrýda ilgerileý baıqalady, kelisimsharttyq jumys jandanyp, ózara yntymaqtastyq nyǵaıyp keledi. SJRA halyqaralyq uıymdarmen dıalog alańy retinde qyzmet atqaryp, memlekettik organdarǵa qoljetimdilikti jeńildetedi, — dedi Takeo Koıke.
Aǵymdaǵy ózara is-qımyldyń mysaly retinde Qaraǵandy qalasynda 300 oryndyq kópsalaly ýnıversıtettik aýrýhana salý jobasynyń iske asyrylý barysy qaraldy. Joba qazaqstandyq jáne halyqaralyq kompanııalardyń qatysýymen jeke áriptesti aıqyndaý boıynsha konkýrstyq rásimder kezeńinde.
Almaty qalasynda Q.I. Sátbaev atyndaǵy Qazaq ulttyq zertteý tehnıkalyq ýnıversıteti janynan stýdenttik jataqhanalar salý jobasyn iske asyrý máseleleri talqylandy. Jýyrda jobany konsýltatsııalyq súıemeldeý týraly kelisimge qol qoıylǵany atap ótildi, bul kelesi kezeńge — konkýrstyq rásimderdi daıyndaýǵa jáne jeke ınvestor tartýǵa kóshýge múmkindik beredi.
Jetisý oblysyndaǵy gıdroenergetıka salasyndaǵy jobalarǵa erekshe nazar aýdaryldy.
Óz kezeginde Áset Erǵalıev memlekettik-jekeshelik áriptestik tetikterin dáıekti damytý jáne jobalardy iske asyrýdyń barlyq kezeńinde odan ári súıemeldeýdiń mańyzdylyǵyn atap ótti.
Kezdesý negizgi jobalar boıynsha aldaǵy jumysty úılestirýge jáne olardy iske asyrýdyń kelesi kezeńderine ótýdi aıqyndaýǵa múmkindik berdi.
Budan buryn Azııa damý banki Qazaqstan jobalaryna 5,5 mlrd dollar ınvestıtsııa salatyny aıtyldy.
