Qazaqstanda MJÁ aıasyndaǵy jobalarǵa jiti saraptama júrgiziledi
NUR-SULTAN. QazAqparat – «Qazaqstandyq memlekettik-jeke menshik áriptestik ortalyǵy» AQ vıtse-prezıdenti Talǵat Tursynbaev MJÁ aıasynda bıyl qandaı maqsat kózdelip otyrǵanyn aıtyp berdi, dep habarlaıdy QazAqparat tilshisi.
«Qazirgi ýaqytta josparlanyp jatqan jobalar sany 400-den asady. Biraq bul jobalardyń barlyǵyn dál bıyl júzege asyramyz degen josparymyz joq. Ekinshiden, aldymyzda MJÁ tetigin odan ári damytý mindeti tur. Bul – óte úlken másele. Munyń bir tusy tsıfrlandyrý bolsa, ekinshi jaǵy – jobalardy josparlaý satysyndaǵy sarapshylardyń jasap jatqan qyzmetiniń sapasyn kóterý. Úshinshi másele – atqarylǵan jobalardy pandemııadan keıin qaıta qarastyrý, keıbir jobalardyń ári qaraı júzege asyrylýynyń tıimdiligin saraptaý. Bul – kúrdeli protsess, saraptaý barysynda jaǵdaı kelisimshartty buzýǵa deıin jetýi múmkin», - deıdi Talǵat Tursynbaev Úkimettiń baspasóz qyzmetiniń mamanyna bergen suhbatynda.
Onyń aıtýynsha, pandemııaǵa deıin ózekti bolǵan kóptegen máselege qazirgi ekonomıkalyq jaǵdaıda bıýdjetten aqsha bólý qanshalyqty tıimdi ekeni qarastyrylady.
