Qazaqstanda myńǵa jýyq memqyzmetshi tsıfrlyq saýattylyqtan ótti

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev memlekettik qyzmetshilerge tsıfrlyq daǵdyny meńgerip, memqyzmetterdi tek elektrondy formatta alýǵa shaqyrdy, dep habarlaıdy «QazAqparat» HAA tilshisi.

Agenttiktiń baspasóz qyzmetiniń keltirgen málimetine sáıkes, bul qadam birinshiden, kórsetiletin qyzmettiń aýqymy men sapasyn arttyrýǵa, ekinshiden, resýrstardy únemdeýge múmkindik beredi.

«Eń aldymen, «Azamattarǵa arnalǵan úkimet» memlekettik korporatsııasynyń ókilderiniń arqasynda Agenttik pen oǵan qaraıtyn vedomstvolardyń qyzmetshileri tsıfrlyq daǵdyny úırendi. Esep komıtetiniń, energetıka, ishki ister men qorǵanys mınıstrliginiń, Astana qalasyndaǵy úsh aýdannyń memlekettik kirister basqarmasynyń qyzmetshileri osyndaı daǵdyny meńgerip otyr. Qazirgi tańda myńǵa jýyq memlekettik qyzmetshi tsıfrlyq saýattylyqtan ótti», - dep habarlaıdy Agenttiktiń baspasóz qyzmetinen.

Habarlamaǵa sáıkes, elimizdiń barlyq óńirlerinde memlekettik qyzmetshilerge elektrondy tsıfrlyq qoltańba (ETsQ) berilýde.

«Qazirgi tańda memlekettik qyzmetshilerdiń 95,2 paıyzyna, al memlekettik organdarǵa qaraıtyn vedomstvolardaǵy jumysshylardyń 64,8 paıyzyna ETsQ berilgen. Naýryzdyń aıaǵyna qaraı bul kórsetkishti 100 paıyzǵa deıin jetkizý kózdelip otyr», - dep habarlady baspasóz qyzmetinen.

Sonymen birge, Agenttik memlekettik qyzmetti elektrondy formatta alatyndaı bıýdjettik uıymdar men kvazımemlekettik sektordyń jumysshylaryn oqytpaq.