Qazaqstanda myqty shahmatshy jigitter bar ma
ASTANA. QazAqparat - Astanada shahmattan álem chempıonaty ótip jatyr. Oǵan álemniń eń myqty áıelder jáne erler komandalary qatysýda, dep habarlaıdy QazAqparat tilshisi.
Tanymal shahmatshy Dármen Sádýaqasovtyń aıtýynsha, Qazaqstan quramasynda qyzdar ǵana emes, myqty shahmatshy uldar da bar.
«Endi, bizde Dınara Sádýaqasova, Jansaıa Ábdimálik, Bıbisara Asaýbaeva sııaqty juldyzdar bar. Olar týraly ylǵı aıtamyz. Biraq osy chempıonatta álemge taǵy bir shahmatshy tanyldy. Ol - Rınat Jumabaev. Ázirshe, jeke esep boıynsha Rınat birde-bir ret jeńilmegen. Chempıonatta ol birinshi nómirmen óner kórsetip jatyr. Oǵan qarsy shyǵyp jatqandar da №1. Máselen, álem juldyzyna aınalǵan Sergeı Karıakın men Maıkl Adamsty jeńdi. Olar - myqty shahmatshylar», - dedi D.Sádýaqasov jýrnalısterge bergen suhbatynda.
Onyń aıtýynsha, reseılik Sergeı Karıakın tanymal shahmatshy Magnýs Karlsenmen oınap, teń túsken bolatyn. Qosymsha ýaqytta ǵana jol berip qoıdy. Al Maıkl Adams uzaq ýaqyt boıy álemniń úzdik shahmatshylarynyń ondyǵynda bolǵan. Búginde ol Ulybrıtanııanyń úzdik oıynshysy sanalady.
Eske sala keteıik, buǵan deıin Dármen Sádýaqasov shahmatshy Bıbisara Asaýbaevanyń Reseıden qaıtyp kelýine qatysty pikir bildirgen bolatyn.
«Men ózim Bıbisaranyń talantyna tántimin. Áli esimde, 6 jasynda men ony synaqtan ótkizdim. Sol kezde onyń qabiletin kórip, anasyna birden aıttym. Onyń boıynda sırek kezdesetin talant, myqty tabıǵı qabilet bar. Ol bir nársege zeıin qoıyp, uzaq otyra alady. Ony «zeıin kontsentratsııasy» deıdi. Dál osy kontsentratsııany Bıbisara uzaq ýaqyt ustap otyra alady. Negizi, ár adamnyń zeıin qoıý qabileti ártúrli. Al Bıbisara test kezinde óte jaqsy nátıje kórsetti. Shahmatshy úshin bul asa qajet qabilet, úlken artyqshylyq», - dedi D.Sádýaqasov jýrnalısterge bergen suhbatynda.
Aıta keteıik, erler arasyndaǵy chempıonatta Qazaqstan atynan Rınat Jumabaev, Murtas Qajyǵalıev, Ánýar Ismaǵambetov, Denıs Mahnev, Petr Kostenko men Pavel Kotsýr óner kórsetip jatyr. Al áıelder arasyndaǵy chempıonatta Jansaıa Ábdimálik, Dınara Sádýaqasova, Bıbisara Asaýbaeva, Gúlishan Nahbaeva, Gúlmıra Dáýletova men Arman Pashıkıan el namysyn qorǵaýda.
