Qazaqstanda Mýzeılerdiń ulttyq keńesin qurý josparlanyp otyr
ASTANA. QazAqparat - Ekonomıkalyq yntymaqtastyq jáne damý uıymyna múshe elderdegi tájirıbege sáıkes, qazirgi kezde QR Ulttyq mýzeıi bazasynda Mýzeılerdiń ulttyq keńesin qurý múmkindigi qarastyrylýda. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Mádenıet jáne sport vıtse-mınıstri Ǵalym Ahmedıarov málim etti.
«Biryńǵaı jalpy respýblıkalyq mýzeı jelisin qurý nátıjesinde barlyq mýzeıler bir uıymda birigetin bolady, bul óz kezeginde olardyń qyzmetin úılestirýdi atqaryp, el ishinde jáne syrtta mýzeıler arasynda baılanysty damytý úshin jaǵdaı jasalady», - dedi ol.
Mınıstrdiń orynbasarynyń sózine qaraǵanda, Ulttyq keńes qosymsha mýzeı qorlaryn izdeýmen jáne jınaýmen aınalysady, arheologııa men tarıh, mýzeı isinde zertteý jobalaryna ǵylymı qyzmetkerlerdi tartady, sondaı-aq qosymsha qarjylandyrý kózderin tabý maqsatynda tıisti jumystardy iske asyrady.
Onyń paıymynsha, mýzeıler tarıhı-mádenı murany keńinen dáripteý maqsatynda ǵylymı mekemelerdiń, muraǵattardyń, kitaphanalardyń ózara is-qımyly men yntymaqtastyǵynyń tirek ortalyǵy bolýy tıis.
