Qazaqstanda múıizdi iri qara jáne usaq mal baǵasy qansha

ASTANA. KAZINFORM – Elimizde mal baǵyp, sharýashylyqpen aınalysý úshin qomaqty qarjy kerek, dep habarlaıdy Kazinform agenttiginiń tilshisi. 

Baǵa reıtıngin jasaý kezinde sıyr, eshki, qoı men shoshqanyń bazardaǵy qunyn bildik. Sút, et jáne júnin paıdalanýǵa bolady.

Sıyr

Sıyrdyń baǵasy qazirgi kezde sharyqtap tur. Zeńgi baba tóliniń quny jasyna qaraı ártúrli ekenin aıta ketý kerek. Árıne, buzaý satyp alyp, baqqan tıimdi.

Sıyrdyń eń arzany Taldyqorǵanda satylady. Munda baǵa 220 000 - 660 000 teńge aralyǵynda. Qostanaıda sál joǵary. Bul qaladaǵy bazarda sıyr 250 000 - 600 000 teńgege satylyp jatyr. Petropavlda 250 000 - 650 000 teńge, Pavlodarda 250 000 - 700 000 teńge.

Tarazda sıyr baǵasy 270 000 teńgeden bastalady. Saýyn sıyr baǵasy 650 000 teńgege deıin jetedi. Túrkistan men Ekibastuzda baǵa 280 000 teńgeden bastalyp, 600 000 jáne 700 000 teńgege jetip tur.

Al Qyzylorda, Qaraǵandy jáne Jezqazǵanda sıyr baǵasy 300 000 teńgeden bastalady. Kókshetaý men Astanada baǵa – 320 000 - 600 000 teńge.

Aqtóbede sıyrdy 350 000 - 700 000 teńgege satyp alýǵa bolady. Almatyda baǵa – 360 000 - 900 000 teńge. Aıtyp óteıik, asyl tuqymdy sıyr baǵasy odan da qymbat. 

Oral, Atyraý, Óskemende sıyr satyp alý úshin 400 000 teńge kerek. Al Semeı bazarynda baǵa 420 000 teńgeden bastalady. 

Ekinshi orynda Shymkent tur. Baǵa 450 000 - 900 000 teńge aralyǵynda. Al birinshi orynda – Aqtaý qalasy. Munda sıyr 550 000 - 700 000 teńge turady.

Eshki

Eshki sútin, túbitin, terisi men etin kádege jaratyp, sharýashylyqpen aınalysam degen adamdar úshin jaǵymdy jańalyq bar. Sharýashylyqtyń bul túrin kásip etý úshin kóp qarjy qajet emes.

Qyzylorda, Kókshetaý, Pavlodar, Astana men Almatyda eshki baǵasy tómen. Munda eshki quny 20 000 teńgeden bastalady. Keıde sútti eshki baǵasy 120 000 - 195 000 teńgege jetedi. Habarlamalarda kóbine saýyndy eshki týraly jazylady.

Taraz ben Qostanaıda eshkini 25 000 teńgege satyp alýǵa bolady. Onyń ishinde Tarazda asyl tuqymdy eshki baǵasy 300 000 teńgege deıin barady. Al Qostanaıda saýyndy eshki baǵasy 90 000 teńge.

Petropavl, Ekibastuz, Túrkistanda eshki baǵasy 30 000 - 35 000 teńge. Al Aqtóbe, Oral, Taldyqorǵanda 35 000 teńge bolyp tur.

Qaraǵandy, Jezqazǵanda eshkini 40 000 - 45 000 teńgege satyp alýǵa bolady. Atyraý, Óskemen, Semeıde eshki quny – 50 000 teńge.

Shymkentte eshki qymbat. Munda 70 000 teńge, asyl tuqymdy eshki – 320 000 teńge. Al Aqtaýda eshkiniń baǵasy – 90 000 - 200 000 teńge.

Kollaj: Kazinform

Qoı

Qoı baǵasy Qazaqstanda ártúrli. Túrkistanda – 15 000 - 90 000 teńge aralyǵynda. Al Almatyda – 18 000 - 80 000 teńge, Tarazda – 29 000 - 180 000 teńge. Elimizdegi ózge qalalarda baǵa 30 000 teńgeden joǵary. 

Qostanaı men Petropavlda 30 000 teńgeden bastalady. Al Qazaqstan astanasynda qoı baǵasy – 35 000 - 80 000 teńge. Qyzylordada – 40 000 - 45 000 teńge. Odan keıin turǵany Taldyqorǵan qalasy. Mundaǵy baǵa – 45 000 - 90 000 teńge.

Qaraǵandy, Jezqazǵan, Pavlodar, Ekibastuzda qoı baǵasy 50 000 teńneden bastalady. Bul qalalarda eń qymbat qoı 60 000 teńge bolyp tur. Atyraýda baǵa sál joǵary. Qoı baǵasy – 55 000 - 70 000 teńge.

Kókshetaý, Oral, Óskemen men Semeıde baǵa 60 000 teńgeden bastalady. Bul elimizde qoı baǵasy qymbat úshtikke kiretin qalalar. Ekinshi orynda Aqtóbe men Aqtaý tur. Munda qoıdy 70 000 teńgeden satyp alýǵa bolady. Al eń qymbaty Shymkent qalasynda. Munda baǵa – 75 000 - 200 000 teńge.

Shoshqa

Qazaqstannyń kez kelgen qalasynan shoshqa tabyla bermeıdi. Elimizdiń ońtústik óńirlerinde óte sırek kezdesedi. Sondyqtan reıtıng tek shoshqa satylatyn qalalar arasynda jasaldy. 

Eń arzany – Taraz qalasynda. Munda baǵa – 20 000 - 120 000 teńge aralyǵynda. Sodan keıin turǵan Qaraǵandy men Jezqazǵanda shoshqa baǵasy – 25 000 - 200 000 teńge.

Kókshetaý, Óskemende eń arzan shoshqa quny 30 000 teńge bolyp tur. Aıtyp óteıik, bul aqshaǵa kóbine toraı nemese áli salmaq qos qoımaǵan jas shoshqany ǵana satyp alýǵa bolady. 

Qostanaıda shoshqa baǵasy shamamen – 40 000-60 000 teńge, Almatyda 40 000 teńgeden bastalyp, 250 000 teńgege jetedi. 

Petropavlda – 50 000 - 150 000, Pavlodarda – 80 000 - 160 000 teńge. Al Shymkentte shoshqa baǵasy qymbat. Munda 150 000 - 300 000 teńgege satylady. 

Buǵan deıin elimizdiń óńirlerinde úı janýarynyń quny qansha ekenin jazǵan edik.