Qazaqstanda muraǵa qalǵan dúnıe-múlik úshin kimder 20% salyq tóleıdi
QOSTANAI. KAZINFORM — Qostanaı oblysy boıynsha memlekettik kirister departamenti Qazaqstandaǵy múlikti muraǵa alǵan shetel azamattary qandaı jaǵdaıda salyq tólep, deklaratsııa tapsyrýy tıis ekenin túsindirdi.
Qazaqstannyń salyq rezıdenti bolyp sanalmaıtyn shetel azamattary men azamattyǵy joq adamdar el aýmaǵyndaǵy múlikti muragerlikke ala alady. Alaıda mundaı jaǵdaıda olar salyq tóleýge mindetti bolady.
Qostanaı oblysy boıynsha Memlekettik kirister departamentiniń málimetinshe, beırezıdent muraǵa alǵan múlki úshin jeke tabys salyǵyn ózi eseptep, ózi tóleýge mindetti. Bul jaǵdaıda salyq mólsherlemesi — 20%.
Máselen, Germanııa azamaty Qostanaıdaǵy quny 35 mln teńge bolatyn páterdi muraǵa alsa, ol 20% mólsherinde jeke tabys salyǵyn tólep, tabysy men múlki týraly deklaratsııany (270.00 formasy) usynýy qajet.
Deklaratsııa kelesi jyldyń 1 shildesine deıin tapsyrylyp, salyq 10 shildege deıin tólenýi qajet.
Eger beırezıdent bul merzim aıaqtalǵanǵa deıin Qazaqstannan ketip, qaıta oralmaıtyn bolsa, deklaratsııany elden shyǵar aldynda tapsyryp, salyqty aldyn ala tóleı alady. Ol úshin Qazaqstannyń jeke sáıkestendirý nómirin (JSN) rásimdeýi qajet.
Vedomstvo muraǵa qalǵan múlik keıin satylǵan jaǵdaıda da salyqtyq mindetteme týyndaıtynyn eske saldy. Mundaı kezde múlikti satýdan túsken tabysqa 15% mólsherinde jeke tabys salyǵy salynady.
Eger Qazaqstan men murager turatyn memleket arasynda qosarlanǵan salyq salýdy boldyrmaý týraly kelisim bolsa, beırezıdent onyń talaptaryn paıdalana alady. Ol úshin deklaratsııamen birge basqa memlekettiń salyq rezıdenti ekenin rastaıtyn qujatty qosa tapsyrýy qajet.
Memlekettik kirister departamenti shetel azamattaryna aıyppul men qosymsha shyǵyndarǵa jol bermeý úshin salyqtyq mindettemelerin ýaqytyly oryndaýǵa keńes beredi.
Aıta keteıik, jańa Salyq kodeksiniń jobasyna túzetýler paketi ázirlengenin jazǵan bolatynbyz.
