Qazaqstanda munaıdy tereń óńdeý 94 paıyzǵa jetedi — Úkimet basshysy

ASTANA. KAZINFORM — 2040-shy jylǵa deıingi tujyrymdamaǵa sáıkes, Qazaqstanda munaıda óńdeý qýattylyǵy 39 mln tonnaǵa deıin ulǵaıady. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda Úkimet basshysy Oljas Bektenov málim etti. 

— Munaı-gaz sektorynda qaıta óńdeý kólemi artyp keledi. Shymkent munaı óńdeý zaýyty óndiristik qýatyn 12 mln tonnaǵa deıin ulǵaıtatyn bolady. Gaz óńdeý salasy boıynsha da Jańaózen «Qazaq Gaz óńdeý zaýyty», Qashaǵan gaz óńdeý kesheni jáne Teńiz gaz aıyrý kesheni sııaqty mańyzdy jobalar júzege asyrylyp jatyr. Atalǵan óndiris oryndarynyń barlyǵy qosylǵan quny joǵary ónim shyǵarýdy qamtamasyz etedi. «Beıneý — Bozoı — Shymkent» gaz qubyrynyń ekinshi jelisi óńirlerdi gazdandyrý isin jedeldetip, ındýstrııalyq jobalardy damytýǵa jańa múmkindikter ashady. Total Energies, Masdar, Energy China jáne China Power sııaqty halyqaralyq áriptestermen birlesip, jalpy qýaty 4 GVt-tan asatyn jańartylatyn energııa kózderin (JEK) damytý jobalaryn iske asyryp jatyrmyz, — dedi Oljas Bektenov.

Onyń aıtýynsha, «jasyl» kún tártibimen qatar, dástúrli energetıkany, sonyń ishinde kómir sektoryn da damytýǵa basa mán berilgen. Jalpy qýaty 1 (bir) GVt bolatyn úsh zamanaýı kómir jylý elektr stantsııasynyń qurylysy bastaldy.

— Biz munaı óńdeý salasyn damytýǵa da basymdyq berip otyrmyz. Búginde jylyna shamamen 18 mln tonna munaı óńdeledi. Salany damytýdyń 2040-shy jylǵa deıingi tujyrymdamasyna sáıkes, óńdeý qýattylyǵy 39 mln tonnaǵa deıin ulǵaıyp, óńdeý tereńdigi 94 paıyzǵa jetedi. Sonymen qatar Qazaqstan OPEK+ kelisimi aıasyndaǵy óz mindettemelerine berik bolyp, jahandyq munaı naryǵyn turaqtandyrý úshin qajetti sharalardy qabyldap otyrǵanyn atap ótemin, — dedi Premer-mınıstr.

Budan buryn habarlanǵandaı, Kazakhstan Energy Week — 2025 jáne XVI Eýrazııalyq KAZENERGY forýmynda «QazMunaıGaz» UK» AQ basqarma tóraǵasy Ashat Hasenov kompanııa úshin asa mańyzdy baǵyttardy atady.