Qazaqstanda munaı jáne gaz kondensatyn óndirý 96-98 mln tonnaǵa deıin tómendeýi múmkin
ASTANA. KAZINFORM — 2026 jyly Qazaqstanda munaı men gaz kondensatyn óndirý kólemi josparlanǵan deńgeıden az bolýy múmkin. Bul týraly Energetıka mınıstri Erlan Aqkenjenov aıtty.
— Ekonomıkany damytý jospary boıynsha bul kórsetkish 100,5 mln tonna bolǵan (2026 jylǵa). Meniń oıymsha, jyl sońynda jáne osy jyldyń basynda bolǵan oqıǵalar, ıaǵnı KQK-ǵa jasalǵan shabýyl men Teńizdegi jaǵdaı saldarynan óndirý kólemi 96-98 mln tonna shamasynda bolady, — dedi Erlan Aqkenjenov Parlament Májilisinde tilshiler suraǵyna jaýap bere otyryp.
Mınıstr bul turǵyda másele munaıdy, gaz kondensatyn óndirýge qatysty ekenin aıtty.
Eske salsaq, byltyr qarasha aıynda Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy.
Budan buryn habarlanǵandaı, 18 qańtarda Teńiz ken ornynda órt bolyp, 450-den asa jumysshy evakýatsııalanǵan edi.
28 qańtarda Erlan Aqkenjenov Teńiz ken ornynda janyp ketken transformatorlar jóndelip, munaı óndirý bir apta ishinde qalpyna keltiriletini týraly aıtqan edi.
11 naýryzda Energetıka mınıstri Teńiz ken ornynda munaı óndirý jumysy qalpyna keltirilgenin aıtty.
