Qazaqstanda munaı ónimderi naryǵynda ústem úleske ıe kompanııalar anyqtaldy

ASTANA. KAZINFORM — Básekelestikti qorǵaý jáne damytý agenttigi 2025 jylǵa arnalǵan jumys jospary aıasynda 2022–2024 jyldar aralyǵyndaǵy benzın, dızel otyny jáne avıaotyn kóterme saýda naryǵyndaǵy básekelestik jaǵdaıdy taldaýdy aıaqtady. Bul týraly agenttiktiń baspasóz qyzmeti málim etti.

Taldaý nátıjesinde elimizdegi jeńil munaı ónimderi naryǵynda 100-ge jýyq kompanııa jumys isteıtini anyqtaldy.

Olardyń ishinde eń irileri:

• QazMunaıGaz toby – «QazMunaıGaz» UK AQ, «QazMunaıGaz-Aero» JShS, Atyraý munaı óńdeý zaýyty (MÓZ), «PetroKazahstanOılProdakshn»;

• CNPC (Qytaı ulttyq munaı-gaz korporatsııasy) toby – «KNNK Internatsıonal v Kazahstane» JShS, «PETROSUN» JShS, «KC Energy group» JShS.

2022–2024 jyldar aralyǵynda bul eki iri top Qazaqstandaǵy munaı óńdeý zaýyttarynda shamamen 9,5 mıllıon tonna jeńil munaı ónimin óndirgen. Bul – ishki naryqtaǵy jalpy tutynýdyń 96%-yn quraıdy.

Úlesteri qandaı?

Agenttik júrgizgen taldaý boıynsha, QazMunaıGaz ben CNPC toptarynyń naryqtaǵy jıyntyq úlesi 85%-dan asady. Bul olarǵa bólshek naryqtaǵy baǵalar men jetkizý protsesterine yqpal etýge múmkindik beredi.

Negizgi qýat ıeleri retinde tanylǵan úlester:

Dızel otyny naryǵynda:

• Qysqy dızel otyny:

  • CNPC toby – 60%,

  • QazMunaıGaz toby – 33%

• Jazǵy jáne maýsymaralyq dızel:

  • CNPC – 46%,

  • QazMunaıGaz – 33%

AI-92 jáne AI-95 benzıninde:

• CNPC toby – 54%,

• QazMunaıGaz toby – 34%

Avıaotyn naryǵynda:

• CNPC toby – 53%,

• QazMunaıGaz toby – 32,4%

Qýatqa teń qoljetimdilik

Kodeks talaptaryna sáıkes, osyndaı negizgi qýat ıeleri naryqtaǵy basqa oıynshylarǵa da teń qoljetimdilik berýge mindetti. Bul protsess arnaıy bekitilgen qaǵıdalarǵa sáıkes júrgiziledi.

Aıta keteıik, buǵan deıin Básekelestikti qorǵaý jáne damytý agenttigi elektr energııasyn kóterme satý jáne teńgerimdeý naryǵyndaǵy jaǵdaıdy taldap, birqatar júıeli máselelerdi anyqtaǵan edi.