Qazaqstanda munaı ónimderiniń jetispeýshiligi tek 2017 jyldan keıin aýyzdyqtalady - A.Maǵaýov
ASTANA. 16 qańtar. QazAqparat - Qazaqstandaǵy munaı ónimderiniń tapshylyǵy tek 2017 jyldan keıin ǵana aýyzdyqtalady. Bul týraly búgin ótken baspasóz máslıhatynda «KazEnergy» assotsıatsııasynyń Bas dırektory Áset Maǵaýov aıtty.
«Qazirgi kezde munaı ónimdenine degen defıtsıt anyq sezilip otyr. Biraq 2017 jyly 3 munaı óńdeý zaýytyn modernızatsııalaý jumystary aıaqtalǵan soń, bul kórsetkishtiń jaqsarý múmkindigi bar», - dedi ol.
Degenmen, 2020 jyldan keıin munaı ónimderine degen suranys tek ósip otyrady. «Sondyqtan atalǵan másele jańa munaı óńdeý zaýytyn salýǵa nemese qoldanystaǵylardyń birin taǵy da jetildirýge ıtermeleýi múmkin», - dep atap ótti Á. Maǵaýov.
«Eger de gazben jumys jasaıtyn qozǵaltqyshtarǵa arnalǵan janarmaı naryǵyn belsendi túrde damyta tússek, atalǵan máseleni uzaq merzimge qaldyra turýǵa bolar edi», - degen oıymen bólisti ol.
Á. Maǵaýovtyń pikirinshe, 2017 jyly munaı óńdeý zaýyttaryn jetildirgennen keıin QR-da mazýt óndirý edáýir azaıýy múmkin. «Eger biz qazir 3,7 mln. tonna mazýt óndirip otyrsaq, 2017 jyldan keıin 1,5 mln. tonnaǵa deıin azaıýy múmkin. Sondyqtan osy otyn túrin qoldanatyn elektr stansalary men qazandyqtarǵa balama otyn túrlerine kóshe bastaý kerek nemese soǵan saı jetildirý qajet», - dep túıindedi Assotsıatsııa basshysy.
