Qazaqstanda munaı óndirýdi arttyrý ádisteri boıynsha halyqaralyq semınar ótti

ALMATY. KAZINFORM — Qazirgi tańda Qazaqstannyń birqatar munaı ken oryndarynda ınnovatsııalyq ádister tabysty túrde iske asyrylyp jatyr. Bul týraly QR Energetıka mınıstrliginiń baspasóz qyzmeti habarlady.

Almaty qalasynda ótken munaı óndirýdi arttyrý ádisterine arnalǵan halyqaralyq semınarǵa QR Energetıka vıtse-mınıstri Qudaıbergen Arymbek qatysty.

Sondaı-aq sharaǵa elimizdegi munaı ken oryndaryn ıgerýshi kompanııalar, ǵylymı-zertteý ınstıtýttary, joǵary oqý oryndary, sondaı-aq jabdyq pen hımııalyq reagentter óndirýshiler, lıtsenzııasy bar tehnologııa ıeleri men álemdik jetekshi sarapshylar jınaldy.

Vıtse-mınıstrdiń aıtýynsha, Qazaqstanda munaı óndirý kólemin arttyrýǵa arnalǵan zamanaýı tehnologııalar qoldanylyp keledi. Sonymen birge mınıstrlik bul sheshimderdi ónerkásiptik deńgeıde engizýge jan-jaqty qoldaý kórsetýge ázir.

— Búginde Qazaqstannyń birqatar munaı ken oryndarynda ınnovatsııalyq ádister tabysty túrde iske asyrylyp otyr. Qalamqas jáne Shyǵys Moldabek ken oryndarynda polımerli aıdaý boıynsha oń nátıje bar. Qazirgi ýaqytta bul tehnologııa eldegi eń kóne Ózen ken ornyna beıimdelgen, — delingen aqparatta.

Aıta keteıik, semınarǵa otandyq jáne halyqaralyq ǵylymı ortalyqtardyń, óndiristik kásiporyndar men sarapshylardyń qatysýy ózara tıimdi yntymaqtastyq ornatýǵa múmkindik beredi. Vedomstvo barlyq usynystardy jan-jaqty zerdelep, perspektıvaly jobalarǵa qoldaý bildirýge daıyn.

Buǵan deıin Premer-mınıstr Oljas Bektenov elimizde munaıdy tereń óńdeý 94 paıyzǵa jetetinin aıtqan bolatyn.