Qazaqstanda munaı óndirý kólemi artady

ASTANA. KAZINFORM – Búgin Májilistiń jalpy otyrysynda Premer-mınıstrdiń orynbasary – Ulttyq ekonomıka mınıstri Nurlan Baıbazarov elimizdiń 2025 – 2029 jyldarǵa arnalǵan áleýmettik-ekonomıkalyq damý boljamyn tanystyrdy.

«Boljamdy qalyptastyrýdyń negizine munaıdyń baǵasy barreline 75 AQSh dollary jáne dollardyń eseptik baǵamy 470 teńge bolǵandaǵy bazalyq stsenarııi alyndy. Boljam boıynsha 2025 jyly jalpy ishki ónimniń naqty ósýi 5,6 paıyzǵa jetedi. 5 jyl ishinde jalpy ishki ónimniń ortasha jyldyq ósýi – 5,4 paıyzdy quraıdy. Nomınaldy jalpy ishki ónim 2025 jylǵy 150,8 trln teńgeden 2029 jyly 234,2 trln teńgege deıin ósedi. Ekonomıkanyń barlyq salalarynda ósim bolady dep eskerilip oltyr. Máselen, ónerkásiptegi ortasha jyldyq ósý qarqyny 4,1 paıyz, onyń ishinde óńdeý ónerkásibinde – 5,8 paıyzdy, taý-ken óndirý ónerkásibinde 2,9 paıyzdy quraıdy», - dedi N. Baıbazarov.

Onyń aıtýynsha, aýyl sharýashylyǵyndaǵy ortasha jyldyq ósim 5,3 paıyzdy, qurylysta – 9,3 paıyzdy, kólik qyzmetterinde 8,2 paıyzdy jáne saýdada 7,1 paıyzdy quraıdy.

«Munaı óndirý kólemi 2025 jyly 97,2 mln tonnadan 2029 jyly 104,8 mln tonnaǵa deıin ulǵaıady. Taýarlardyń eksporty 2025 jyly 82,3 mıllıard AQSh dollardan 2029 jyly 90 mıllıard AQSh dollarǵa deıin ósedi dep boljanýda. Import 61,3 mıllıard AQSh dollardan 67,5 mıllıard dollarǵa deıin ósedi. Inflıatsııa deńgeıi 2025 jyly 5,5 jáne 7,5 paıyz, 2026 jyly 5 jáne 6 paıyz aralyǵynda aıqyndaldy, keıinnen 2027-2029 jyldary 5 paıyzǵa deıin tómendeıdi dep qarastyrylǵan», - dedi mınıstr.

Makroekonomıkalyq kórsetkishterdiń boljamy negizinde 2025-2027 jyldarǵa arnalǵan bıýdjet pen Ulttyq qor parametrleriniń boljamy qalyptastyryldy.

Bıýdjet kiristeriniń negizgi ósimi ekonomıkanyń damý qarqynyn ulǵaıtý jáne salyq salasyndaǵy ákimshilendirýdi jaqsartý, sondaı-aq kóleńkeli ekonomıkanyń úlesin tómendetý esebinen qamtamasyz etiledi.

«Kepildendirilgen transfert bıýdjet qaǵıdasyn eskere otyryp, jyl saıyn 2 trln tenge mólsherinde aıqyndaldy», - dedi vedomstvo basshysy.