Qazaqstanda munaı óndirý kólemi 8,9 paıyzǵa artty
«Ótken aptanyń qorytyndysy boıynsha táýliktik munaı óndirý kólemi 8,9 paıyzǵa artyp, táýligine 1,559 mln. barrelge jetti. Buǵan qosa, gaz óndirý de 17,6 paıyzǵa ósip, 122,5 mln. tekshe metrge jetip otyr. Sońǵy táýlikte munaı óndirý ósimi barlyq munaı óndirýshi kompanııalarda tirkelgen», - delingen «Munaı jáne gaz aqparattyq-saraptamalyq ortalyǵy» AQ taratqan aqparatta.
Sonymen qatar atalǵan ortalyq málimetterine sáıkes, apta ishinde elimizdiń jetekshi 3 munaı óńdeý zaýyttarynda munaı óńdeý kólemi 1,7 paıyzǵa azaıyp, táýligine 222,1 myń barrelge deıin tómendegen. Aıta keterligi, munaı óńdeý kóleminiń qysqarýyna Shymkent qalasyndaǵy «Petro Qazaqstan oıl Prodakts» zaýytynyń josparly-májbúrli jóndeý jumystaryna baılanysty toqtatylýy sebep bolýda.
Ótken apta qorytyndysynda dızel otynynyń elimizdiń oblystaryndaǵy ortasha baǵasy 128,2 teńgeni quraǵan. Bul rette eń joǵary baǵa Reseımen shektesetin Pavlodar oblysynda lıtrine 136,1 teńge, Shyǵys Qazaqstan oblysynda 133,9 teńge, Soltústik Qazaqstan oblysynda 132,4 teńge, Batys Qazaqstan oblysynda 132,4 teńge jáne Astana qalasynda 132,2 teńge kóleminde belgilengen. Mundaı jaıt Reseıdegi dızel otynynyń ortasha baǵasynyń lıtrine 190 teńge bolýyna baılanysty oryn alýda. Bul tranzıttik kólik quraldarynyń tek Qazaqstan aýmaǵynda janarmaı quıýy úshin ekonomıkalyq alǵyshart jasaýda. Al jergilikti janarmaı quıý beketteri jergilikti tutynýshylar tapshylyq kórmeýi úshin baǵany kóterýde.
