Qazaqstanda munaı óndirý 6,3 paıyzǵa ósti

ASTANA. QazAqparat - Qazaqstanda shıki munaıdy óndirý kólemi 6,3 paıyzǵa ósti, dep habarlaıdy QazAqparat tilshisi Energyprom.kz saıtyna silteme jasap.

«2018 jyldyń qorytyndysynda shıki munaıdy óndirý kólemi naqty mánde 77,5 mln tonnany qurady. Bul 2017 jylmen salystyrǵanda 6,3 paıyzǵa joǵary. Aqshamen eseptegende 12,2 trln teńgege artyq. Óndirilgen munaıdyń shamamen úshten ekige (60,9) jýyǵy Atyraý oblysyna (47,2 mln tonna, bir jylda ósim 11,6 paıyz), 23,3 paıyzy Mańǵystaý oblysyna (18 mln tonna, jyldyq ósim 0,7 paıyz), 8,3 paıyzy Qyzylorda oblysyna (6,4 mln tonna, bir jylda 6,2 paıyzǵa kemigen) tıesili», - delingen jarııalanǵan materıalda.

QR Energetıka mınıstrliginiń málimetine sáıkes, ótken jylǵy munaı óndirýdiń jyldyq jospary 20 paıyzǵa artyǵymen oryndalǵan. 2018 jyldyń qorytyndysynda Qashaǵan ken ornynan 13,2 mln tonna munaı (jospar - 11 mln tonna) óndirilgen. Al Teńiz ken ornynan alynǵan munaıdyń kólemi 28,6 mln tonnany quraıdy. Bul jyldyq jospardan 1 mln tonnaǵa artyq. Qarashyǵanaqta ta munaı óndirý jospary tolyqtaı oryndaldy. Atalǵan ken ornynan 12,2 mln tonna munaı alyndy.

Ótken jyly elimizdiń 4 munaı óńdeý zaýytyna munaı jetkizý kólemi de arta túsken. Eksporttyq baǵytta da ósim bar. Máselen, 2018 jyldyń 11 aıynda 33,7 mlrd dollardyń 63,2 mln tonna munaıy eksportqa shyǵarylǵan. Bul rette Qazaqstan munaıynyń negizgi ımporttaýshysy Italııa bolyp otyr.

2018 jyldyń 11 aıynyń qorytyndysy boıynsha qazaqstandyq munaıdyń eksporttyq baǵasy 2017 jylǵy sáıkes kezeńmen salystyrǵanda 42,2 paıyzǵa artqan.