Elimizde munaı óńdeý qýaty jylyna 39 mln tonnaǵa deıin artady
ASTANA. KAZINFORM – Qazaqstanda munaı óńdeý kólemin jylyna shamamen 39 mln tonnaǵa deıin jetkizý josparlanyp otyr. Bul týraly Energetıka mınıstri Erlan Aqkenjenov Úkimet otyrysynda aıtty.
Onyń málimetinshe, jumys istep turǵan úsh zaýytty keńeıtý nátıjesinde munaı óńdeýdiń jıyntyq qýaty jylyna 18 mln tonnadan 29,2 mln tonnaǵa deıin artady.
– Buǵan qosa, jyldyq qýaty 10 mln tonna bolatyn jańa munaı óńdeý zaýytyn salý josparlanyp otyr. Osy jobany eskergende, eldegi munaı óńdeý qýaty jylyna shamamen 39 mln tonnaǵa jetedi, – dedi Erlan Aqkenjenov.
Mınıstrdiń aıtýynsha, óndiristik qýattyń aıtarlyqtaı ulǵaıýy salaǵa qajetti kadr sanyna da áser etedi.
– Qýattyń osylaı ósýi bilikti jumysshylar sanynyń birneshe ese artýyn talap etedi, — dedi Erlan Aqkenjenov.
Byltyr eldegi munaı óndirý kólemi 99,5 mln tonnaǵa jetken edi.
Álemdik munaı baǵasy turaqty túrde qymbattap jatyr.
