Elimizde munaı óńdeý kólemi 4,7 paıyz artty

ASTANA. KAZINFORM — Memleket basshysy Energetıka mınıstri Erlan Aqkenjenovti qabyldady

Qazaqstanda munaı óńdeý kólemi 4,7 paıyz artty
Foto: Aqorda

Qasym-Jomart Toqaevqa otyn-energetıka keshenin damytýdyń bıylǵy on aıdaǵy negizgi nátıjeleri, jylytý maýsymy jáne aldaǵy kezeńge arnalǵan josparlar týraly esep berildi.

Prezıdentke jylytý maýsymy elimizdiń barlyq aımaǵynda qalypty ótip jatqany baıandaldy.

Elektr stantsııalaryn jóndeýge arnalǵan qarjy 384 mıllıard teńgege deıin ulǵaıtyldy. Negizgi jabdyq pen jeliler jóndeldi, jylý elektr ortalyqtarynyń tozý deńgeıi tómendedi, sondaı-aq qaterli «qyzyl aımaqtaǵy» stantsııalardyń sany beske deıin qysqardy.

Elektr energııasyn óndirý 10 aıda 2,3 paıyzǵa artyp, 102,4 mıllıard kVt/saǵatqa jetti.

Erlan Aqkenjenov Memleket basshysyna munaı óńdeý kólemi 4,7 paıyzǵa óskenin jáne janar-jaǵarmaıdyń jalpy qory 1,2 mıllıon tonnaǵa deıin kóbeıgenin aıtty. 

Otandyq bıtým óndirisi (1,1 mıllıon tonna) eldiń ishki suranysyn tolyqtaı ótedi. 

Shymkent munaı óńdeý zaýytynyń qýatyn jylyna 12 mıllıon tonnaǵa deıin keńeıtý jáne Atyraý oblysynda jańa munaı hımııasy keshenin salý jobalary qolǵa alyndy.

Jyl sońyna deıin halyqty gazben qamtamasyz etý deńgeıi 64,5 paıyzǵa jetedi. Nátıjesinde 13,2 mıllıon azamat kógildir otynnyń ıgiligin kórmek. 

Qashaǵanda jáne Jańaózende jańa gaz óńdeý zaýyttarynyń qurylysy júrip jatyr. Qarashyǵanaqtaǵy jáne Qashaǵandaǵy ekinshi gaz óńdeý zaýyttarynyń jobasy boıynsha EPC-kelisimsharttar jasaldy.

Memleket basshysynyń Joldaýda aıqyndaǵan mindetterin oryndaý maqsatynda mınıstrlik energııany kóp tutynatyn derekterdi óńdeý ortalyqtary men jasandy ıntellekt qajettilikterin eskere otyryp, elimizdiń 2035 jylǵa deıingi biryńǵaı energetıkalyq teńgerimin qaıta qaraýǵa kiristi. Al geologııalyq barlaýdy jandandyrý úshin 112 ken ýchaskesi elektrondy aýktsıonǵa shyǵaryldy. Bul — rekordtyq kórsetkish.

Sonymen qatar Prezıdentke otyn-energetıka kesheni nysandarynyń tsıfrlyq telnusqalaryn jáne 1,2 mıllıon tutynýshyǵa kómir jetkizý barysyna monıtorıng jasaıtyn biryńǵaı platformany engizý jóninde málimet berildi.

Kezdesý sońynda Prezıdent Qasym-Jomart Toqaev halyqty energııamen jáne jylýmen tolyq qamtamasyz etý, janar-jaǵarmaı men kómir naryqtarynyń turaqtylyǵyn qatań baqylaýda ustaý, sondaı-aq ınvestıtsııalyq jobalardy sapaly júzege asyrý jóninde birqatar tapsyrma berdi.