Qazaqstanda munaı men gazdy tereń óńdeıtin 5 zaýyt salynady

NUR-SULTAN. QazAqparat – 2025 jylǵa qaraı polıetelentereftalat jáne metanol óndiretin zaýyttar iske qosylady. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Nur Otan» partııasynyń «Ózgerister joly: Ár azamatqa laıyqty ómir!» saılaýaldy baǵdarlamasy aıasynda Atyraý, Oral jáne Shymkent qalalarynda munaı men gazdy tereń óńdeıtin 5 zaýytty iske qosý arqyly eksportqa baǵyttalǵan munaı-gaz hımııa ónimderiniń óndirisin 2019 jylmen salystyrǵanda 9 esege ulǵaıtý kózdelge», - dedi óńdeý ónerkásibin damytý jaıynda baıandaǵan mınıstr.

Onyń atap ótýinshe, búgingi tańda 3 zaýyt salynýda.

«Atap aıtsam: Atyraý oblysynda qýaty jylyna 500 myń tonna polıpropılen óndiretin zaýyt jáne qýaty 57 mln tekshe metr azot jáne 34 mln tekshe metr qurǵaq syǵylǵan aýa óndiretin zaýyt, Shymkent munaı-hımııa zaýytynyń shıkizaty negizinde qýaty jylyna 81 myń tonna polıpropılen jáne 57 myń tonna benzınge arnalǵan oktan arttyrǵysh qospa shyǵaratyn zaýyt», - dedi ol.

Nurlan Noǵaevtyń aıtýynsha, budan basqa, 2025 jylǵa qaraı 2 áleýetti jobany iske asyrý josparlanǵan. Olar: qýaty jylyna 430 myń tonnany quraıtyn polıetelentereftalat óndirý zaýyty men jyldyq qýaty 130 myń tonna bolatyn metanol óndirý zaýyty.