Qazaqstanda munaı men gaz tasymaly 4,3 protsentke ósti

ASTANA. QazAqparat - Aǵymdaǵy jyldyń І jartyjyldyǵynda Qazaqstannyń magıstraldy qubyrlarymen 113,3 mln tonna munaı men gaz tasymaldandy. Bul kórsetkish byltyrǵy jyldyń osy kezeńimen salystyrǵanda 4,3% artyq. Al jalpy júk aınalymy 63,7 mıllıard tonna-shaqyrymǵa jetip, byltyrǵy jylǵa qaraǵanda +7,4% boldy, dep habarlaıdy QazAqparat energyprom.kz saıtyna silteme jasap.

Magıstraldy munaı qubyrynyń ulttyq operatory «KazTransOıl» AQ 2017 jyldyń alǵashqy jartyjyldyǵynda tasymaldaǵan munaı kólemi 22,7 mln tonnaǵa jetkenin habarlaǵan. Bul 2016 jylǵy kórsetkishpen salystyrǵanda 4% artyq. Al munaı ónimderiniń tutastaı tasymaly men aýystyra jetkizýleri  28,9 mln tonnaǵa jetti. Bul 2016 jyldyń birinshi jartyjyldyǵymen salystyrǵanda 2% kóp.

«QazMunaıGaz» kompanııasyna tıesili taǵy bir joba - halyqaralyq Kaspıı qubyry konsortsıýmynyń kórsetkishi 2017 jylǵy jospar boıynsha 65 mln tonnany quraıdy. Onyń ishinde qazaqstandyq óndirisshiler úlesine 54 mln tonna tıesili bolsa, sonyń 11 mln tonnasy Qashaǵannyń munaıy.

Toqtala ketetin jaıt, bıylǵy jyly munaı tasymaly boıynsha kórsetkishter trendi oń nátıjege oıysýy múmkin. Óıtkeni 2014 jyldan beri magıstraldy qubyr jelisi boıynsha júk tasymalynyń dınamıkasy tómendep kele jatqan bolatyn. Máselen, 2016 jyldyń ózinde 2015 jylmen salystyrǵanda jalpy tasymal kórsetkishi 4,1% azaıǵan edi.

Aıta keteıik, Qazaqstan aýmaǵyndaǵy munaıgaz tasymaldaıtyn qubyrlar uzyndyǵy 23,3 myń shaqyrymdy quraıdy, onyń ishinde 15,3 myń shaqyrym - gaz, 8 myń shaqyrym - munaı qubyry.