Qazaqstanda munaı men gaz kondensatyn esepke alýdyń aqparattyq júıesi iske qosyldy
Energetıka mınıstrliginiń málimetinshe, júıege qazirdiń ózinde 25 munaı óndirýshi uıym, 4 munaı tasymaldaýshy kompanııa jáne 3 munaı óńdeý zaýyty qosyldy. Qazirgi ýaqytta qalǵan óndirýshi kompanııalardy júıege qosý jumystary júrgizilýde.
«Aqparattyq júıeni qurý jáne engizý jumystary «Tsıfrlyq Qazaqstan» baǵdarlamasy men «Tsıfrlandyrý, ǵylym jáne ınnovatsııalar esebinen tehnologııalyq serpilis» ulttyq jobasy sheńberinde Energetıka jáne Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń basshylyǵymen júrgizildi. Aqparattyq júıe munaıdy daıyndaý, óńdeý jáne tasymaldaý kezeńderinde esepke alý aspaptarynan derekter jınaýdy avtomattandyrady. Derekterdi berý avtomatty rejımde júzege asady», - dep jazdy vedomstvo.
Munaı men gaz kondensatyn esepke alýdyń aqparattyq júıesine engizýdiń negizgi kórsetkishteri:
- jedel derekter negizinde memlekettik deńgeıde basqarýshylyq sheshimder qabyldaýdy qoldaý;
- shıki munaı men gaz kondensatynyń aınalymyn boljaý;
- esepke alý aspaptarynan alynǵan derekter negizinde esepterdi avtomatty qalyptastyrý.
«Budan basqa, esepteý aspaptarynan derekterdi avtomatty túrde jınaý jer qoınaýyn paıdalanýshylarǵa kúndelikti eseptilikti qolmen tapsyrý shyǵystaryn qysqartýǵa, sondaı-aq adamı faktordy alyp tastaýǵa baılanysty derekterdi durys engizbeý táýekelderin barynsha azaıtýǵa múmkindik beredi», - delingen habarlamada.
