Qazaqstanda munaı qory qashan sarqylýy múmkin

QR Energetıka vıtse-mınıstri Ashat Hasenov Qazaqstandaǵy munaı qory neshe jylǵa jetetinin aıtty, dep habarlaıdy Kazinform.

«Qor eki sanatqa bólinedi. Geologııalyq turǵydan alynatyn kólem boıynsha 15,5 mıllıard tonnasy bar, sondaı-aq naqty óndiriletin 4,4 mıllıard tonnasy belgilengen», — dedi A. Hasenov Senattyń jalpy otyrysynan keıin tilshiler suraǵyna jaýap bere otyryp.

Onyń sózine qaraǵanda, jańa ken oryndarynyń ıgerilýine nemese barlaýdan ıgerýge ótýine baılanysty elimizdegi munaı qory arta túsedi.

«Qor kólemi ózgerip turatyny túsinikti. Eger matematıkalyq turǵyda eseptesek, jylyna 100 mln tonna óndirgen jaǵdaıda, 4,4 mlrd tonna bizge 40-45 jylǵa jetedi. Biraq 45 jyldan keıin munyń bári taýsylady degen sóz emes. Jyl saıyn jańa ken oryndary barlaýdan ıgerý kezeńine ótkendikten, qor tolyqtyrylady», – dedi vıtse-mınıstr.

Ashat Hasenov jańa tehnologııalardyń damýyna baılanysty Qazaqstanda tereńde jatqan munaıdy ıgerý múmkindigi artatynyn aıtty.

«Ǵylymı zertteýlerdiń nátıjesi boıynsha jer qoınaýynda 76 mıllıard tonna munaı qory bolýy múmkin. Bul qorǵa qatysty tyńǵylyqty zertteý jasaý kerek», - dep túıindedi sózin Ashat Hasenov.