Qazaqstanda munaı kenishteri orta eseppen 50 paıyzǵa ǵana ıgeriledi - QR UǴA akademıgi Nádir Nádirov
ALMATY. Qańtardyń 9-y. QazAqparat /Erlik Erjanuly / - Munaı kenishterin ıgerýdiń álemdik ortasha deńgeıi 50-55 paıyzdy quraıdy.
Ony Ulttyq ınjenerlik akademııanyń vıtse-prezıdenti, QR UǴA akademıgi Nádir Nádirov QazAqparat tilishisine bergen suhbatynda aıtty.
"Kenishti tolyq ıgerý álemde áli kúnge deıin úlken másele bolyp qalýda. Oǵan óndirýdiń ózindik qunynyń joǵary bolýy óz áserin tıgizýde. 50 jyl buryn munaı óz energııasymen shyǵatyn. Sol kezde ony óndirý arzanǵa túsetin. Qazirgi munaı birinshiden 5-6 shaqyrymdyq tereńdikte jatyr jáne onyń quramy qoıý. Ony shyǵarý úshin sý, aýa jiberý kerek. Sodan keıin onyń baǵasy kóterilip keledi. Kenishti ıgerý kezinde qazirgi ǵylym men bilimniń jetkeni álem boıynsha 50-55 paıyzdy quraıdy. Ol munaıynyń suıyq bolýyna baılanysty Iranda 70 paıyz bolýy múmkin", deıdi akademık Nádir Nádirov. Ǵalymnyń aıtýynsha, munaı óndirýdiń ózindik quny qazirgi tańda Iran men Irakta 1 barreli 1 dollar, Reseıde 12 dollar kóleminde. Qazaqstanda bul týraly aıtylmaǵanmen, ol orta eseppen 15 dollardy quraýy múmkin. Máselen, quramyna baılanysty kenishti ıgerý deńgeıi Qarajambasta 35 paıyz, al Jańajolda 70 paıyzdy quraıdy.
