Qazaqstanda munaı-hımııa óndirisine qyzyǵýshy ınvestorlar artyp keledi - vıtse-mınıstr
«Energetıka mınıstrligi erekshe nazar aýdaryp otyrǵan taǵy bir mańyzdy sala - munaı-hımııa salasyn damytý, kómirsýtegi shıkizatyn qaıta óńdep, ónimderin shyǵarý. Ózderińiz biletindeı, munaı-hımııa salasyndaǵy ár dollar ekonomıkada 2-3 dollarlyq ósimdi ákeledi jáne jańa 7 jumys ornyn ashýǵa yqpal etedi. Ónerkásiptiń barlyq salasy derlik munaı-hımııa ónimderin tutynady: qurylys, mashına jasaý, energetıka, aýyl sharýashylyǵy, medıtsına, ǵarysh jáne basqa salalarda ónimge suranys joǵary», - dedi Murat Júrebekov elordada ótip jatqan «Ortalyq Azııadaǵy munaı óńdeý men munaı hımııasy» atty halyqaralyq konferentsııada.
Onyń aıtýynsha, munaı-hımııa salasyna ınvestıtsııa tartý úshin mınıstrlik memlekettik qoldaýdy usynady. Máselen, qazirdiń ózinde Atyraý oblysynda salyqtyq jáne kedendik artyqshylyqtarǵa ıe arnaıy munaı-hımııa aımaǵy qurylǵan.
«Memleket ınfraqurylym qurylysyn júrgizýdi qarjylandyrady. Óıtkeni bul kapıtaldy 20 paıyzǵa jáne paıdalaný shyǵyndaryn15 paıyzǵa deıin azaıtýǵa múmkindik beredi. Sheteldik jumys kúshin tartý tártibi jeńildedi. Osylaısha, vedomstvoaralyq komıssııa deńgeıinde ótinishter bir tereze qaǵıdaty negizinde qaralady. Bul baǵyttaǵy jumys ruqsat berý merzimin eki jyldan úsh aıǵa deıin qysqartty», - dedi ol.
Murat Júrebekov sonymen qatar, jobalaý men qurylysta halyqaralyq standarttardy qoldaný máselesi sheshilgenin atap ótti.
«Memlekettik qoldaý sharalary arqasynda Qazaqstan buryn óndirilmegen benzol (qýaty - jylyna 133 myń tonna) jáne paraksılol (qýaty - jylyna 500 myń tonna) óndirisin (2016 jyly) iske qosty. Munaı-jol bıtýmdarynyń óndirisi 2013 jyly 200 myń tonnadan jylyna 800 myń tonnaǵa deıin tórt ese ósti. Bul jol salasynyń ishki suranysyn tolyq qamtamasyz etedi. 2018 jyly qýaty jylyna 2,6 mlrd dollarlyq polıpropılen óndirýge arnalǵan gaz-hımııa kesheniniń qurylysy bastaldy. Jyl saıyn Qazaqstanda munaı-hımııa óndirisimen aınalysqysy keletin ınvestorlardyń sany artyp keledi. Qazirgi ýaqytta jalpy somasy shamamen 5 mlrd AQSh dollaryn quraıtyn 10-nan astam joba ártúrli damý satysynda tur. Olardy júzege asyrýdyń negizgi máselesi - jobalardy shıkizatpen qamtamasyz etý», - dedi Murat Júrebekov.
