Qazaqstanda munaı-gaz salasyndaǵy ınvestorlar úshin modeldik kelisimshart ázirlenedi

NUR-SULTAN. QazAqparat - QR Premer-Mınıstri Álıhan Smaıylov «Shevron» kompanııasy dırektorlar keńesiniń tóraǵasy jáne bas atqarýshy dırektory Maıkl Ýırtpen kezdesý ótkizdi. Bul týraly QazAqparat Úkimettiń baspasóz qyzmetine silteme jasap habarlaıdy.

Taraptar kompanııanyń Qazaqstandaǵy qyzmeti, ishki naryqqa taýarlyq jáne suıytylǵan munaı gazyn jetkizý, sondaı-aq Teńiz jáne Qarashyǵanaq ken oryndarynda birlesken jobalardy iske asyrý máselelerin talqylady.

Úkimet basshysy «Shevron» kompanııasy Qazaqstannyń alǵashqy strategııalyq seriktesteriniń biri ekenin, elimizde kóptegen ekonomıkalyq jáne áleýmettik máselelerdi sheshýge qatysqanyn atap ótti.

«Qazirgi tańdaǵy álemdegi ahýal bizden energetıka salasyndaǵy yntymaqtastyqty keńeıtýdi talap etedi. Memleket basshysynyń tapsyrmasy boıynsha «QazaqGaz» ulttyq kompanııasyna taýarlyq gazdyń qosymsha kólemin satý týraly ýaǵdalastyqqa qol jetkizildi. Bul bizdiń resýrstyq bazamyzǵa úlken áser etedi», — dedi Álıhan Smaıylov.

Sonymen qatar Premer-Mınıstr Teńiz ken ornyndaǵy saǵalyq qysymdy keńeıtý jáne basqarý jobalaryn iske asyrýdyń mańyzdylyǵyn atap ótti.

Úkimet basshysy Qazaqstannyń ishki naryqty suıytylǵan munaı gazymen qamtamasyz etý máselesine erekshe nazar aýdaratynyn aıtty. Osyǵan baılanysty TShO resýrstarynan ishki naryqqa qosymsha gaz bólý máselesi pysyqtalyp jatyr.

Sonymen qatar Álıhan Smaıylov «Shevron» kompanııasynyń $248 mln-ǵa Tikeleı ınvestıtsııalar qoryn qurý boıynsha júrgizgen jumysyn atap ótti. Qor jumysy aıasynda otandyq ınvestıtsııalyq jobalar iske asyrylmaq.

Óz kezeginde Maıkl Ýırt «Shevron» kompanııasynyń birlesken jobalardy iske asyrýdy jalǵastyrýǵa daıyndyǵyn rastady.

«Qazaqstannyń energetıkalyq sektorda damý áleýeti zor. Ony iske asyrý jańa jumys oryndaryn qurýǵa jáne ekonomıka úshin qosymsha múmkindikter ashýǵa kómektesedi. Bizdiń jobalar boıynsha úlken jumys atqaryldy, alaıda bolashaqta áli de kóp jumys júrgizý kerek», — dedi Maıkl Ýırt.

Sondaı-aq Premer-Mınıstr munaı-gaz salasynyń ınvestıtsııalyq tartymdylyǵyn arttyrý aıasynda ınvestorlar úshin qazynalyq jáne retteýshi preferentsııalar paketin qamtıtyn jaqsartylǵan modeldik kelisimshart ázirlenetinin habarlady. Ol jańa teńiz jobalaryna, qurlyqtaǵy kúrdeli jobalarǵa jáne gaz jobalaryna qoldanylady.

«Biz birlese úlken jol júrip óttik. Qazaqstan Úkimetiniń birlesken josparlardy iske asyrýda syndarly dıalogqa árdaıym ashyq ekendigine sendirgim keledi», — dedi Álıhan Smaıylov.

Foto: primeminister.kz