Qazaqstanda munaı boıynsha kelisimshart jasaý kezinde ulttyq múddeni qorǵaıtyn jumys toby quryldy

ASTANA. QazAqparat – Elimizde iri munaı kelisimsharttaryn jasasý kezinde ulttyq múddelerdi qorǵaý jónindegi jumys toby quryldy. Onyń usynystary bolashaqta tórelik talqylaýlarda qoldanylady, dep habarlaıdy QazAqparat tilshisi.

«Ónimdi bólý týraly kelisimderde Qazaqstan Respýblıkasynyń múddelerin qorǵaýdy qamtamasyz etý maqsatynda:

1. Osy ókimniń qosymshasyna sáıkes quramda ónimdi bólý týraly kelisimderdi iske asyrý máseleleri jónindegi jumys toby qurylsyn.

2. Jumys toby ónimdi bólý týraly kelisimderde, onyń ishinde tórelik talqylaýlar boıynsha Qazaqstan Respýblıkasynyń múddelerin qorǵaý jóninde usynystar tujyrymdamasyn ázirleıdi.

3. Osy ókimniń oryndalýyn baqylaý QR Premer-Mınıstriniń birinshi orynbasary Roman Sklıarǵa júktelsin», - delingen Úkimet basshysy Álıhan Smaıylov qol qoıǵan ókimde.

Málim bolǵandaı, atalǵan komıssııanyń quramyna myna laýazymdaǵy tulǵalar endi:

- QR Premer-Mınıstri, tóraǵa;

- QR Premer-Mınıstriniń birinshi orynbasary;

- QR Premer-Mınıstriniń orynbasary – Qarjy mınıstri, tóraǵanyń orynbasary;

- QR Energetıka vıtse-mınıstri, hatshy;

- QR Prezıdenti Ákimshiligi Basshysynyń birinshi orynbasary (kelisim boıynsha);

- QR Prezıdentiniń keńesshisi (kelisim boıynsha);

- QR Ádilet mınıstri;

- QR Energetıka mınıstri;

- QR Bas prokýrorynyń orynbasary (kelisim boıynsha);

- QR Ulttyq qaýipsizdik komıteti tóraǵasynyń orynbasary (kelisim boıynsha);

- «Samuryq-Qazyna» ulttyq ál-aýqat qory» aktsıonerlik qoǵamynyń basqarma tóraǵasy (kelisim boıynsha);

- «PSA» jaýapkershiligi shekteýli seriktestiginiń bas dırektory (kelisim boıynsha).