Qazaqstanda múmkindigi shekteýli jandarǵa poıyz bıletin satyp alý jeńildedi

NUR-SULTAN. QazAqparat - 2019 jyldyń 1 shildesinen bastap «Mobius» jol júrý bıletterin resimdeýdiń jańa júıesine tolyq kóshý júzege asyryldy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, bul elektrondyq júıe halyqqa bılet satyp alý sharttaryn edáýir jaqsartty. Sondaı-aq, oryn bolmaǵan jaǵdaıda jolaýshyǵa ótinim jasaýǵa múmkindik beretin «kútý paraǵy» sııaqty jańa fýnktsııalar paıda boldy. Sol boıynsha bos oryn paıda bolǵanda (bıletter qaıtarylǵan jaǵdaıda) jolaýshynyń elektrondyq poshtasyna habarlama jiberiledi.

Bul rette jolaýshynyń derekterin aýystyrý múmkin emes. Osylaısha, jolaýshylardy aýystyrý múmkindigi alynyp tastaldy. Sonymen qatar, 2019 jyldyń tamyz aıynda jolaýshylardy tasymaldaý erejelerine ózgerister engizildi. Soǵan sáıkes barlyq toptaǵy múmkindigi shekteýli jandarǵa, sondaı-aq múgedek balalarǵa áleýmettik mańyzy bar baǵyttarǵa bılet 50% jeńildikpen satylady.

«Tulpar-Talgo» kommertsııalyq poezdarynda (sýbsıdııalanbaıtyn) tasymaldaýshynyń qalaýy boıynsha múmkindigi shekteýli adamdar úshin mamandandyrylǵan oryndarǵa 70% jeńildik belgilengen.
Sonymen qatar, 2020 jylǵy 26 maýsymynan bastap bilet.railways.kz saıtynda múmkindigi shekteýli jandar úshin jeńildikpen satylatyn bıletterdi onlaın resimdeıtin jańa qyzmet paıda boldy Ondaı bıletterdi onlaın resimdeý úshin jolaýshy «Jolaýshylar tasymaly» AQ bılet kassasynda (bir ret) tirkeýden ótkizip, biregeı sımvoldar jıyntyǵy bar «Meıirim» elektrondy dıskonttyq kartasyn alýy qajet. Tirkelgennen keıin jolaýshy bıletterdi úıden shyqpaı-aq jeńildetilgen baǵamen onlaın satyp ala alady. Elektrondyq karta iske qosylǵan sátten bastap bir jyl boıy jaramdy bolady jáne onyń merzimin uzartý jolaýshydan ótinimdi qaıta almaı-aq júrgiziledi.