Qazaqstanda múmkindigi shekteýli jandardyń 60 paıyzdan astamy jumysqa qabiletti jasta - S.Jaqypova

ASTANA. QazAqparat - Qazaqstanda múmkindigi shekteýli jandardyń 60 paıyzdan astamy jumysqa qabiletti jasta. Bul týraly búgin «Múmkindikteri shekteýli adamdardy áleýmettik beıimdeý jáne ıntegratsııalaýdyń ońaltý tehnologııalary men ınnovatsııalary» halyqaralyq konferentsııasy barysynda QR Densaýlyq saqtaý jáne áleýmettik damý vıtse-mınıstri Svetlana Jaqypova aıtty.

«Búgingi kezdesýimizdiń taqyryby bizder úshin barynsha ózekti. Ózderińizde biletindeı, Qazaqstanda 600 myńnan astam múgedek bar. Olardyń 64 paıyzdan astamy jumysqa qabiletti jasta. Al jalpy múgedekterdiń ishindegi balalardyń úlesi 11 paıyzdy quraıdy»,- dedi vıtse-mınıstr.

Onyń atap ótýinshe, qazirgi zamanǵy jańa syn-qaterlerdi, jańa tehnologııalar men ońaltý qural-jabdyqtaryn eskere otyryp, olardy áleýmettik beıimdeýge keńinen tartý baǵytyndaǵy tıimdi sharalar qabyldaý qajet.

«2005 jyly Qazaqstan múgedekterdi áleýmettik qorǵaý týraly jeke zań qabyldap, áleýmettik ómirge keńinen tartýǵa, oryn alyp otyrǵan kedergilerdi joıýǵa baǵyttalǵan ádisterdi jańǵyrtýdy qolǵa aldy. Bul zańdy júzege asyrý úshin 2005-2008 jyldar kezeńine arnalǵan múgedekterdi ońaltý baǵdarlamasy qabyldandy», - dedi ol.

S.Jaqypovanyń aıtýynsha, atalǵan baǵdarlamanyń nátıjesinde elimizdegi qoldanystaǵy áleýmettik qorǵaý júıesiniń negizi qalanyp, kómekke muqtaj jandarǵa qoldaý kórsetildi. 2008-2015 jyldary aralyǵynda múgedekter quqyǵy týraly konventsııany ratıfıkatsılaý sharttaryn qalyptastyrý úshin kóptegen jumystar júrgizildi.