Qazaqstanda múlikti josyqsyz baǵalaýshylar tizilimi jasalady
«Qazirgi ýaqytta bankter Qarjy naryǵyn retteý jáne damytý agenttigi bekitken táýekelderdi basqarý jáne ishki baqylaý júıesin qalyptastyrý qaǵıdalaryna sáıkes kredıtter boıynsha kepildik qamtamasyz etýge baǵalaý júrgizedi. Qaryz berý kezinde táýekel-menedjment boıynsha talaptardy oryndaý úshin bankter táýelsiz baǵalaý kompanııasy (budan ári – TBK) daıyndaǵan baǵalaýdy paıdalaný esebinen qabyldanatyn kepildik qamtamasyz etý qunynyń obektıvtiligin qamtamasyz etedi. Bul rette qamtamasyz etýge qabyldanatyn múliktiń kepildik qunyn bankter halyqaralyq eseptilik standarttarynyń talaptaryna sáıkes aıqyndaıdy. Standarttarǵa sáıkes kepil qunyn esepteý úshin kepil múlkiniń naryqtyq qunynyń tómendeýi nátıjesinde yqtımal zııandar táýekelin eskeretin dıskonttaý koeffıtsıentteri qoldanylady. Bankterdiń kepildermen jumysy tıisti zańnamalyq aktilermen retteledi», - delingen Úkimet basshysynyń jaýabynda.
Premer-Mınıstrdiń atap ótýinshe, Memleket basshysynyń tapsyrmasy boıynsha kepil múlkin baǵalaý kezinde baǵalaýshylardyń biliktiligine qoıylatyn talaptardy kúsheıtý jáne halyqtyń baǵalaý ınstıtýtyna degen senimin arttyrý úshin Úkimet Qarjy naryǵyn retteý jáne damytý agenttigimen ári jáne múddeli memlekettik organdarmen birlesip zań jobasyn ázirledi.
Zań jobasynda: TBK-niń baǵalaýshylar palatalarynyń kepilder boıynsha esepterin jınaý arqyly táýelsiz baǵalaýdyń sapasyna memlekettik baqylaýdy kúsheıtý jáne olardy odan ári tsıfrlandyrý úshin Qarjy mınıstrliginiń Іshki memlekettik aýdıt komıtetine jiberý; baǵalaý týraly jalǵan esepter daıyndaýǵa jol bermeý úshin josyqsyz baǵalaýshylardyń tizilimin engizý; baǵalaýshylardyń árbir 3 jyl saıyn biliktiligin arttyrý kýrstarynan ótýi boıynsha olarǵa qoıylatyn talaptardy engizý arqyly TBK sarapshylarynyń quzyretin arttyrý; retteýshilik talaptardy saqtamaǵany úshin kýáliktiń qoldanys merzimin 3 jylǵa deıin toqtata turýdy belgileý jáne odan aıyrý merzimin 3 jyldan 5 jylǵa deıin ulǵaıtý esebinen TBK-niń jaýapkershiligin arttyrý kózdelgen.
«Zań jobasy Parlament Májilisiniń qaraýynda. Buǵan qosymsha, bank aktıvteriniń sapasyn jaqsartý úshin Qarjy naryǵyn retteý jáne damytý agenttigi kepildik qamtamasyz etýdi baǵalaý rásimderine, sondaı-aq TBK júrgizgen baǵalaýdyń obektıvtiligin (barabarlyǵyn) qamtamasyz etý úshin qajetti is-sharalar tizbesine qoıylatyn retteýshilik talaptardy qatańdatýdy pysyqtaýda», - dep atap ótedi Asqar Mamın.
