Qazaqstanda mýltısıstemalyq qabyný sındromynan 2 bala qaıtys boldy

NUR-SULTAN. QazAqparat – Qazaqstanda 45 baladan mýltısıstemalyq qabyný sındromy anyqtalǵan. Bul týraly Ortalyq kommýnıkatsııalar ortalyǵynda ótken qazirgi epıdemıologııalyq jaǵdaı jáne qabyldanyp jatqan karantındik sharalar týraly onlaın brıfıngide QR Densaýlyq saqtaý mınıstrliginiń resmı ókili Baǵdat Qojahmetov aıtty, dep habarlaıdy QazAqparat tilshisi.

«Mýltısıstemalyq qabyný sındromy anyqtalǵan balalarǵa toqtalyp ótsem: búgingi tańda 45 jaǵdaı tirkelgen. Jas ereksheligi boıynsha, eki bala 1 jasqa tolmaǵan. 1-5 jas aralyǵynda – 11 bala, 5-17 jasqa deıin – 28 bala tirkeldi. Ókinishke oraı, Nur-Sultan jáne Almaty qalalarynda 2 bala qaıtys boldy», - deıdi QR Densaýlyq saqtaý mınıstrliginiń resmı ókili Baǵdat Qojahmetov.

Onyń aıtýynsha, eń kóp jaǵdaı elordada tirkelip otyr.

«Elordada 11 bala, Aqmola jáne Qaraǵandy oblystarynda, Almaty qalasynda - 5 jaǵdaı, ShQO-da jáne Shymkent qalasynda - 3 jaǵdaı, Aqtóbe, Atyraý óńirlerinde taǵy da 2 jaǵdaıdan, Almaty qalasy, Jambyl, Mańǵystaý jáne Túrkistan oblysynda bir jaǵdaıdan tirkelip otyr. Qazirgi ýaqytta 38 bala jazylyp shyqty. Bireýi statsıonarda áli de emdelýde», - deıdi ol.