Qazaqstanda múgedektigi bar jáne asyraýshysynan aıyrylǵan jandarǵa 617 mlrd teńge tólendi
ASTANA. KAZINFORM – Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy (MÁJ) tóleýge respýblıkalyq bıýdjetten 543,1 mlrd teńge jumsaldy.
Buǵan qosymsha Memlekettik áleýmettik saqtandyrý qorynan (budan ári – MÁSQ) eńbekke qabilettiliginen aıyrylý jáne asyraýshysynan aıyrylý boıynsha shamamen 74,6 mlrd teńge somasyna áleýmettik tólemder júzege asyryldy.
- 2025 jylǵy 1 qarashadaǵy jaǵdaı boıynsha múgedektigi boıynsha MÁJ alýshylar sany shamamen 542,8 myń adamdy, asyraýshysynan aıyrylý jaǵdaıy boıynsha – shamamen 175,4 myń adamdy qurady.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady, - dep jazdy Eńbek jáne halyqty áleýmettik qorǵaý mınıstrliginen.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-dan áleýmettik tólemder júzege asyrylady. Máselen, 2025 jylǵy 1 qarashadaǵy jaǵdaı boıynsha 99,1 myń adam eńbek etý qabiletinen aıyrylý boıynsha áleýmettik tólem, al 67,1 myńǵa jýyq otbasy asyraýshysynan aıyrylý boıynsha áleýmettik tólem aldy.
- Tólemderdiń mólsheri jeke jáne mynalarǵa baılanysty: sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady, - dep túsindirdi vedomstvo.
Múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2025 jylǵy 1 qańtardan bastap eń tómen kúnkóris deńgeıiniń ulǵaıýyna baılanysty 6,5% - ǵa ósti. QR Úkimetiniń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-dan tólenetin tólemderdiń mólsheri de 6,5% - ǵa artty.
Máselen, osy jyly jalpy aýrýdan múgedektigi boıynsha MÁJ mólsheri 1-top úshin – 101 702 teńgeni, 2-top úshin – 81 362 teńgeni, 3-top úshin – 55 474 teńgeni quraıdy.
1 qarashadaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 72 003 teńgeni, asyraýshysynan aıyrylý boıynsha – 75 537 teńgeni quraıdy.
Kópbalaly otbasylar men nagradtalǵan analarǵa qansha járdemaqy tólenetinin mynaý siltemeden oqyńyz.