Qazaqstanda múgedektigi bar jandarǵa birjolǵy tólem beriledi: Qaı óńir qansha qarjy bóldi

Astana qalasynda múgedektigi bar azamattarǵa birjolǵy áleýmettik kómek olardyń múgedektik tobyna qaraı beriledi. Elorda máslıhatynyń sheshimine sáıkes, tólem mólsheri mynadaı:

I toptaǵy adamdarǵa – 20 AEK (86 500 teńge);

II toptaǵy adamdarǵa jáne 18 jasqa deıingi múgedektigi bar balalarǵa – 10 AEK (43 250 teńge);

III toptaǵy adamdarǵa – 5 AEK (21 625 teńge).

Áleýmettik kómek Astanada tirkelgen azamattarǵa «Azamattarǵa arnalǵan úkimet» memlekettik korporatsııasyndaǵy málimetter negizinde ótinishsiz taǵaıyndalady. Alaıda turǵylyqty jerin jaqynda aýystyrǵan azamattar jańa mekenjaıy boıynsha tirkelgenin tekserýi qajet.

Qaǵıda boıynsha, birjolǵy áleýmettik kómek kúntizbelik jylda bir ret jáne bir ǵana negiz boıynsha beriledi. Sondyqtan osy jyly basqa negizben birjolǵy áleýmettik kómek alǵan azamattarǵa bul kúnge oraı qaıta tólem jasalmaıdy.

Aqmola oblysynda I, II jáne III toptaǵy múgedektigi bar adamdarǵa, sondaı-aq múgedektigi bar balalarǵa 3 AEK mólsherinde, ıaǵnı 12 975 teńge birjolǵy kómek qarastyrylǵan.

Oblystyq jumyspen qamtýdy jáne áleýmettik baǵdarlamalardy úılestirý basqarmasynyń málimetinshe, 2026 jylǵy 25 qyrkúıektegi jaǵdaı boıynsha, tólem 25 103 adamǵa berilýge tıis. Bul maqsatqa aýdandyq jáne qalalyq bıýdjetterden 325,7 mln teńge bólingen.

Óńirdiń keıbir qalalary men aýdandarynda tólemder aýdarylyp qoıǵan. Qalǵan azamattarǵa qarajatty qazan aıynda berý josparlanǵan. Alýshylardyń tizimi naqtylanýyna baılanysty olardyń sany ózgerýi múmkin.

Abaı oblysynda I jáne II toptaǵy kámeletke tolǵan múgedektigi bar azamattarǵa, sondaı-aq múgedektigi bar balalarǵa 5 AEK mólsherinde, ıaǵnı 21 625 teńge tólenedi.

Óńirde áleýmettik kómekti aýdarý jumystary bastalǵan. Tólemderdi 20 qazanǵa deıin tolyq aıaqtaý josparlanǵan.

Aqtóbe oblysynda múgedektigi bar azamattarǵa birjolǵy áleýmettik kómek 25 qazan – Respýblıka kúnine oraı beriledi. Memlekettik áleýmettik járdemaqy alatyn múgedektigi bar adamdarǵa 13 AEK, ıaǵnı 56 225 teńge, al múgedektigi bar balalarǵa – 26 AEK, ıaǵnı 112 450 teńge tóleý kózdelgen.

Atyraý oblysynda Respýblıka kúnine oraı I, II jáne III toptaǵy 18 jastan asqan 22 996 múgedektigi bar azamatqa 20 AEK, ıaǵnı 86 500 teńgeden birjolǵy áleýmettik kómek beriledi. Tólem alý úshin ótinish berý qajet emes. Qarajat belgilengen tártippen azamattardyń esepshottaryna aýdarylady.

Mundaı kómek óńirde 2021 jyldan beri kórsetilip keledi. Sonymen qatar múgedektigi bar balalardy tárbıelep otyrǵan otbasylarǵa da áleýmettik qoldaý qarastyrylǵan. Olarǵa bıyl mamyr aıynda birjolǵy kómek berilgen.

Batys Qazaqstan oblysynda 25 qazan – Respýblıka kúnine oraı 18 jasqa deıingi balalarǵa 20 myń teńgeden birjolǵy tólem berý qarastyrylǵan.

Jetisý oblysynda 2024 jyldan beri Respýblıka kúnine oraı 18 jasqa deıingi múgedektigi bar balalarǵa birjolǵy materıaldyq kómek beriledi. Úkimet qaýlysyna sáıkes, aýdandyq jáne qalalyq máslıhattardyń sheshimderi negizinde tólem mólsheri 6 AEK, ıaǵnı 25 950 teńge bolyp belgilengen.

Bul qarajat balanyń ata-anasyna nemese ózge de zańdy ókiline tólenedi.

Qyzylorda oblysynda Respýblıka kúnine oraı barlyq sanattaǵy múgedektigi bar azamattarǵa 3 AEK, ıaǵnı 12 975 teńge mólsherinde birjolǵy áleýmettik kómek beriledi.

Budan bólek, múgedektigi bar adamdardyń quqyqtaryn qorǵaý kúnine oraı, 14 qazanda spartakıada uıymdastyrý josparlanǵan. Al 3 jeltoqsan – Halyqaralyq múgedektigi bar adamdar kúnine oraı arnaıy is-shara ótkizý kózdelgen.

Pavlodar oblysynda Respýblıka kúnine oraı múgedektigi bar azamattar men olardyń otbasylaryna birneshe sanat boıynsha tólem qarastyrylǵan:

múgedektigi bar balalardy tárbıelep otyrǵan otbasylarǵa – 25 AEK, ıaǵnı 108 125 teńge;

I jáne II toptaǵy múgedektigi bar adamdarǵa – 5 AEK, ıaǵnı 21 625 teńge;

Qazaqstannyń joǵary oqý oryndarynda aqyly negizde oqıtyn múgedektigi bar stýdentterge – 60 AEK, ıaǵnı 259 500 teńge;

Qazaqstannyń kolledjderinde aqyly negizde oqıtyn múgedektigi bar stýdentterge – 30 AEK, ıaǵnı 129 750 teńge.

Túrkistan oblysynda Múgedektigi bar adamdardyń quqyqtaryn qorǵaý kúnine oraı, úıde arnaýly áleýmettik qyzmet kórsetiletin 18 jasqa deıingi múgedektigi bar balalarǵa kómek berý josparlanǵan. Bul sanatqa 3 182 bala kiredi.

Óńirde áleýmettik kómekpen qatar, aýdan-qalalardaǵy «Teń qoǵam» ortalyqtarynda arnaıy jáne qaıyrymdylyq is-sharalaryn ótkizý kózdelgen.

Shymkent qalasynda múgedektigi bar balalarǵa birjolǵy áleýmettik kómekti 25 qazan – Respýblıka kúnine oraı tóleý josparlanyp otyr. Qala ákimdiginiń málimetinshe, 18 jasqa deıingi balalarǵa 5 AEK, ıaǵnı 21 625 teńgeden beriledi.

1 qyrkúıektegi derek boıynsha, qalada osy sanatqa jatatyn 8 238 bala tirkelgen. Tólemge jergilikti bıýdjetten 178,1 mln teńge baǵyttaý kózdelgen.

Budan bólek, ata-ana qamqorlyǵynsyz qalǵan 720 balaǵa 20 AEK, ıaǵnı 86 500 teńgeden tólenedi. Bul maqsatqa 62,3 mln teńge qarastyrylǵan.

Qalada 80 jastan asqan jalǵyzbasty azamattarǵa da aı saıyn áleýmettik qoldaý kórsetiledi. Qazirgi ýaqytta 101 zeınetkerge 2 AEK, ıaǵnı 8 650 teńgeden tólenip otyr. Olardy qoldaýǵa 7 mln teńge bólingen.

Al 16 jeltoqsan – Táýelsizdik kúnine oraı Jeltoqsan oqıǵasyna qatysqany úshin saıası qýǵyn-súrgin qurbany retinde aqtalǵan 33 adamǵa 65 AEK, ıaǵnı 281 125 teńgeden berý josparlanǵan. Bul tólemge 9,2 mln teńge qarastyrylǵan.

Ulytaý oblysynda 18 jastan asqan I, II jáne III toptaǵy múgedektigi bar azamattarǵa 20 myń teńgeden birjolǵy áleýmettik tólem beriledi.

Jergilikti atqarýshy organdardyń málimetinshe, qarajat qoldanystaǵy áleýmettik kómek kórsetý qaǵıdalaryna sáıkes, azamattardyń bank shottaryna ótinishsiz aýdarylady. Tólemderdi aýdarý jumystary 15 qazanǵa deıin júrgiziledi.

Al Jańa jyl qarsańynda 7 jasqa deıingi múgedektigi bar balalarǵa, sondaı-aq 7-den 18 jasqa deıingi I, II jáne III toptaǵy múgedektigi bar balalarǵa 40 myń teńgeden birjolǵy áleýmettik tólem berý qarastyrylǵan.

Almaty qalasy, Almaty oblysy, Jambyl, Mańǵystaý, Soltústik Qazaqstan, Shyǵys Qazaqstan, Qostanaı, Qaraǵandy oblystarynda múgedekterdi qorǵaý kúnine bir rettik tólem qarastyrylmaǵan.

Buǵan deıin múgedektigi bar azamattarǵa qandaı tólemder qarastyrylǵanyn jazǵan edik.