Qazaqstanda muǵalimderdiń jalaqysyn 500 myń teńgege kóterýdi usynýda

«Álemdegi eń mańyzdy mamandyqtardyń biri, ol - muǵalim mamandyǵy. Naq sol adamdar bizdiń balalarymyzdy oqytady, olarǵa bilim beredi, balanyń tulǵalyq qasıetterin qalyptastyratyn da solar. Biz, ata-analar, táýlik boıy jumysta júremiz de, balalarymyzben tek keshki asta sóılesemiz. Muǵalim bizdiń balalarmen birge bizden on ese kóp bolady. Biz balalarymyzdyń taǵdyryn muǵalimniń qolyna berip qoıǵanbyz. Sondyqtan bizdiń muǵalimder barlyq jaǵynan úzdik bolýlary tıis. Moraldyq, zııatkerlik, sonyń ishinde qarjylyq turǵydan da. Búgin muǵalimder 50 myńnan 100 myńǵa deıin ǵana jalaqy alady. Osynaý asa jaýapkershiligi mol ári aýyr eńbek úshin bul tym az», - deıdi ol óziniń Feısbýktegi paraqshasynda.

Advokattyń aıtýynsha, muǵalimder kúnine 15 saǵattan, demalyssyz qyzmet etedi. Pedagogıkalyq jumyspen qatar, esep toltyrý sııaqty túrli bıýrokratııalyq jumystar bar. «Búginde muǵalimderdiń jumysy eń stresske toly jumys deýge bolady, sebebi olardyń mártebesine nuqsan kelgen, al syıly bolmaǵan adamǵa balalardy jaqsy dúnıelerge sýsyndatý óte qıyn», - deıdi ol.

«Sonymen qatar muǵalim mamandyǵy olardan birneshe ese kóp jalaqy alatyn jáne zeınetaqylary qamtamasyz etilgen mınıstrlerden, sottardan, generaldardan, depýtattardan áldeqaıda joǵary. Prezıdenttiń «bizdiń elge eńbekke adal emes qyzmetkerlerdi aýystyrý úshin shetelden saýatty ári myqty mamandardy tarta almaı otyrmyn» dep aıtqan sózi bar edi. Bizge eshkim de kerek emes, bizge ózimizge saýatty jáne bilimi joǵary adamdardy shyǵarýymyz kerek. Biraq ony jasaý úshin bizdiń muǵalimder úzdiktiń úzdigi bolýy shart. Al ol úshin muǵalimderdiń jalaqysyn birneshe jyl boıy, kezeń-kezeńmen 500 myń teńgege deıin kóterý qajet. Sol kezde ǵana muǵalimder otbasyn asyraýǵa qajetti aqshany oılaýdy doǵarady, sonymen qatar muǵalimder arasynda baıqaýlar júrgizilip otyrady. Osy tusta bizdiń bilim berý deńgeıimiz joǵarady, ata-analar qosymshalarǵa balalaryn jiberip, balany áýrege de salmaıtyn bolady.

Men túsinemin, bul iske mıllıardttaǵan qarajat qajet. Biraq saýatty jáne oıly qoǵam týmaıynsha, sheksiz tabıǵı baılyqtar, túrli baǵdarlamalar men reformalar bizge kómektese almaıdy. Taǵy da aıta ketetin jaıt, bizdiń barlyq mektepter Nazarbaev zııatkerlik mektepterinen kem túspeýi shart. Balalardyń barlyǵy birdeı, sondyqtan birdeı jaǵdaılarda bilim alýlary kerek», - dep túıdi sózin zańger.