Qazaqstanda moped mingender júrgizýshi kýáligin alyp, saqtandyrý polısin rásimdeıdi

ASTANA. KAZINFORM – Qazaqstanda moped tizgindegender júrgizýshi kýáligin alyp, saqtandyrý polısin rásimdeý tıis bolady.

«Qazirgi kezde Іshki ister mınıstrligi (Parlament Májilisi depýtattarynyń bastamasymen ázirlengen) tıisti zań jobasynyń talqylaýyna qatysyp jatyr. Qujatta mopedterdi jol júrisi qaýipsizdigin qamtamasyz etý boıynsha ýákiletti memlekettik organda memlekettik tirkeýge jatatyn kólik quraldarynyń tizbesine engizý usynyldy. Sonymen qatar, mopedterdi mehanıkalyq kólikterge teńestirý, mehanıkalyq kólik quraldarynyń júrgizýshilerine qoıylatyn talaptarǵa sáıkes moped júrgizýshileriniń quqyqtary men mindetterin aıqyndaý eskerilgen», - delingen Іshki ister mınıstrliginiń Kazinform agenttigine bergen jaýabynda.

Munymen qosa, moped júrgizýshilerine «A1» sanatyndaǵy júrgizýshi kýáliginiń bolýy týraly (16 jastan bastap beriledi) talap qoıý usynyldy. Bul óz kezeginde árbir mopedti tirkeýge jáne tıisinshe olardyń júrgizýshilerine mehanıkalyq kólik quraldarynyń júrgizýshileri úshin qarastyrylǵan talaptardy qoıýǵa múmkindik beredi. Osy rette, júrgizýshi kýáligin alý, saqtandyrý polısin rásimdeý, kólik quralyna tehnıkalyq tekserý júrgizý jáne basqa da máseleler sheshiledi.

«Atalǵan zań jobasy qabyldanǵannan keıin moped júrgizýshileri joldaǵy kólik qozǵalysy erejelerin buzǵany úshin mehanıkalyq kólik quraldarynyń júrgizýshilerine uqsas jaýapkershilikke tartylady. ıAǵnı moped júrgizýshisi mehanıkalyq kólik quraldarynyń júrgizýshilerine júktelgen jaýapkershiliktiń barlyq spektrin kóteredi», - dep atalyp ótken vedomstvo aqparatynda.

Aıta keteıik, jaqynda Parlament Májilisi «Jol júrisi týraly» Zańyna jekelegen kólik quraldary túrleriniń júrýin uıymdastyrý jáne jol qaýipsizdigin tsıfrlandyrý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qarady. 

Zań jobasynda qozǵaltqyshynyń kólemi 50 tekshe santımetrden az moped sııaqty kólik quraldaryn tirkeý eskerilgen.